Oté

Lo tan va fé son shoi !

Parol avèk mizik :

Témoignages.re / 13 août 2009

Matant Zélida la ékrir Justin :
Mon shèr nové, mon spès salté,
Moin nana konm dan l’idé, zot, bann rouj-de-fon, zot i èm pass la pomade bann kriyèr d’nuite, bann sak i koné dir aryink la bétiz dann z’ot shanté. Ankor, apèl pa sa shanté : dizon plito guélé, sé lo mo k’i fo ansèrvir. Moin la pran la pène ékouté, plito moin la antann san vouloir, vi k’zot i mète z’ot “bibabanm, bibabanm” for, vèy pa koman. Bin, mi pé dir aou : kèstyonn parol, sé zéro kalbass ! Késtyonn mizik, sé zéro kalbass pointé, dizon zéro kalbas la fimé gran-boi. Pran sa pou toi !

Justin la fé pou répons :
Mon vyé matante k’i parl toultan la boush rouvèr ! Vou la jamé pansé toulmoun la poin mèm gou ké vou ? Vou la jamé pansé ké si ou la poinn gou pou in nafèr, lé forsé ou i trouv arpa li valab ? Poitan, nana zoli shanté La Rényon-la, avèk zoli parol, gayar mizik. Nana sak lé ansyin, nana sak i mor arpa zamé, va rèss toultan valab, nana sak i sort koméla é k’i fo in pé d’tan pou abityé. Sa lé normal !
Mé si tout lé pa valab, la pa in rézon pou zète sak lé valab dann poubèl. Matante, lo tan va fé son shoi. Mi pé dir aou !

Justin


Lésplikasyon inn-dé pti mo :

Pass la pomade : flaté san rézon.

Na d’gou : trouv son plézir.

Zéro kalbass la fimé gran boi : in patoi in pé vyé, mé gayar kan-mèm.

Bibabanm, bibabanm : dézord dézordoné, sansa koud-poin, koud-pyé.


Kanalreunion.com