Oté

Lo trin dann l’il Maurice :
La-ba i fé é isi... na in zour i apèl domin !

Justin / 17 septembre 2012

Somenn dèrnyèr, sénatèr Vergoz la fé in konférans do press. Zot i koné sénatèr Vergoz ? Sé lo boug mèm konplis Didier Robert la ral La Rényon déyèr, la kass dévlopman nout péi. Zot i koné ali ! Sé lo boug osi kan la mète ali sénatèr, olèk dévlop in plan pou La Rényon, la di li lé kontan, pars li atann in n’afèr konmsa dopi vintan. Donk in sénatèr pou son plézir pèrsonèl, pou son l’anbisyon pèrsonèl, pou son gonflaj shoviy pèrsonèl.

Donkalor, sénatèr Vergoz la fé in konférans do press pou di sé la kour d’apèl Bordeaux la pran lo désizyon arèt lo tram-train. Alors, la pa Didier Robert ! La pa li non pli la fiziy la MCUR ! Konm la pa Annette la arèt lo Pol Oséan, épi lo Zénith ! Konm la pa Bello la kal lo vil ékolozik dann Sin-Pol ! I fo ète in pé sèryé sénatèr Vergoz : lo trin, sa in n’afèr i fé partou. Sa la pa in késtyonn parti politik : droit konm gosh dan la France i fé bann tram sansa bann tram-trin. Nana sa Bordeaux, Montpellier, Nice, Lille, Rennes… in pé partou ousa lé riskab an avoir problèm sirkilasyon, dann bann granvil konm dann bann vil in pé moin gran. Ou la pa pèr bann Rényoné i tonm dann koma sirkilatoir ou, poitan sé sa k’i pé arivé. Ou i kalkil pa konbien z’èr d’ tan bann Rényoné i pèrd dann transpor don ? Sa sé in n’afèr lé bon pou lékonomi, lé bon pou lo travay, lé bon pou lénèrji prop, lé bon pou la natir, pou l’anvironeman, mèm lé bon pou la santé d’moun.

Lé bon a in kondisyon : sé k’i pans l’intéré bann Rényoné é pa l’intéré bann monopol. Pandann tan-la ? Kabri i manj salad ! Non, pa solman sa, pandann tan-la, la-ba dann l’il Maurice gouvèrnman i sava fé fèr in train modèrn — i apèl sa in métro lézé — é pa pou la Sin Glin-Glin, mé pou l’ané 2015 : in train va roul soisann-kinz kilomète a l’èr, va arèt trèz plas, va transport san mil pèrsone par zour, pétète plis... Anplis ké sa va fé sa an PPP (Parténarya Piblik Privé). Konm nout tram-train... mé la-ba i fé, épi isi... na in zour i apèl domin.

Justin


Kanalreunion.com