Oté

Lo varroa :
In maladi bien sournoi i atak moush a myèl Madégaskar

Témoignages.re / 12 août 2013

Dann Madégaskar, nana vinn-dé réjyon. Na inn i apèl Analamanga ; èl i tonm pa tro loin par rapor Tananariv... Lé ga, moin la pa apré fé in léson zéografi, mé solman anparl azot kékshoz i ariv laba... Laba, dopi dé mil nèf, moush a myèl i tonm malad. Lo maladi i apèl varroa é bann kiltivatèr moush i sèy géri lo maladi é zot i gingn pa.

Dann désèrtin kartyé, ziska katro-vin pour san bann rush lé ataké, é ziska vink-sink pour san bann moush i krèv é lé zot i afayi, la kantité d’myèl i diminyé é bann moun i baz la dsi pou gingn zot vi lé bien an-nuiyé. Varroa , sa sé in parazit, konm k’i diré in zanr z’akarien, in pti bébèt, mé mové parl pa. Li atak bann moush a myèl, é son l’atak lé pa fasil pou anparé.

Moin lé sir zot i sava dir amoin, bann Malgash i soingn pa zot moush. Mé pou in kou, sa la pa vré… zot i soingn lo bann moush, é mèm na dé-troi z’institisyon i èd azot. Mé médikaman lé shèr, é bann z’akarien i vien plizanpli rézistan. Alor, oi zot mèm koman trouv in bon solisyon dann in ka konm sa... Antansyon, la pa solman bann z’abèy Madégaskar lé annuiyé avèk sa, mi sort lir, dan la Frans, la plipar bann rush lé ataké... San konté lo déga bann z’inséktisid i fé dsi bann moush, si tèlman dan la vil lo rush i donn plis do myèl ké dann bitasyon infèkté avèk bann produi.

Lèr-la, ala ké Monsanto — zot i koné Monsanto — i promèt li la trouv in bon solisyon. Li la fé in médikaman pou bat lo varroa a tèr. Zot i konpran si bann kiltivatèr i vien méfyan pars partou, Monsanto, avèk son bann somans zénétikman modifyé, épi son bann médikaman lo ta, l’apré fé déga. Demoun i fé pa konfyans lo bann shovalyé blan, é zot plas, moin sré parèy. An atandan, na poin solisyon, é poinn solisyon, sa i vé dir bann moush plizanpli ataké, moin do myèl, moin flèr fégondé, moin lo blé, moin do ri, moin frui. Tousala, par la fot in maladi bien sournoi apré atak bann moush a myèl, lo varroa .

NB : Sré intérésan konèt la santé bann moush a myèl La Rényon par rapor lo varroa ; Moin la antann dir, la silfat pou tyé moustik la pa épargn bann moush a myèl. Mé in pé i di, lo médikaman lé inonsan. Inosan ? Pétèt oui, pétèt non ? Konm bann marmay té i di dann tan lontan "inosan-erai".

Justin


Kanalreunion.com