Oté

Lo votaz bann z’étranzé : Mi oi pa kouk i anpèsh !

Justin / 25 novanm 2011

Matant Zélida la ékrir Justin :
Mon shèr nové, mon spès salté,
Azot-la, bann rouj-de-fon, zot i koné pi kosa zot i sava invanté pou mèt dézord dan la Répiblik. Ala ké zot i vé donn lo droi voté bann z’étranzé pou z’éléksyonn mèr. Sa alor ! Sa lé in pé for pou trouv in kékshoz konmsa ! Rozman lo pti prézidan la di azot, in n’afèr konmsa lé pa posib, é li la di, li va kal sa tout son fors. Pars in z’éléksyon, sé bann sitoiyin k’i vot. Dan la Frans, sé bann sitoiyin fransé. Lé normal in n’afèr konmsa. Mi pans i fo an avoir in tour dan la bobèsh pou pa pans konm zot. Tok ! pran sa pou toi !

Justin la fé pou répons :
Mon vyé matant k’i koz touzour la boush rouvèr,
San mantir, moin lé a d’mandé kisa na plis in tour dan la bobèsh ké sak i di in n’afèr l’ané 2006 épi i di lo kontrèr l’ané 2011, konm si sak té vré nana sink-an lé pi vré zordi. Matant ! Sa out ti prézidan mèm lé konmsa : l’ané 2006, li lété pou lo vot bann z’étranzé é l’ané 2011, so kou isi, li lé kont. La-ba, dan la Frans, i apèl sa in zirouèt, pars li tourn avèk lo van. Donk out prézidan, sé in prézidan zirouèt.
Astèr, o-fon, in z’étranzé na lo droi travay, na lo droi pèy son z’inpo, na mèm lo droi fé la guèr dan l’armé fransèz, maryé avèk in Fransé ou sinonsa in Fransèz. Li pé an avoir z’anfan fransé. Sèl z’afèr li la poin lo droi, sé voté, sé di son poinn vizé dési bann tèks i sava aplik ali. Moin pèrsonèl, si lo boug i viv dan lo péi, konm in sitoiyin fransé, dann réspé la loi, mi oi pa pou kosa i donn ar pa li lo droi voté dan bann z’éléksyon lokal ; konm out ti prézidan té i di l’ané 2006, li oi pa kouk i anpèsh.

 Justin 


Kanalreunion.com