Lakey lo sit > Chroniques > Oté
« Lo z’ènmi d’mon z’ènmi sé mon z’ami. A ouét ! »
In kozman pou la rout
mèrkrodi 6 avril 2016, sanm
Moin lé pa sir sa in provèrb kréol mé dizon sé in problèm imin, donk in problèm osi pou La Rényon. Kan mi pans sa, moin nana dann l’éspri bann Daesh -i di ankor l’éta islamik. Konm bann z’amérikin la trouv Assad lo prézidan la Syri té z’ot ènmi, zot la rod in manyèr pou roganiz in z’ènmi pou z’ot z’ènmi é pou zot sa té i doi règ lo problèm Assad.
Donk zot la trouv Daesh, la fé roganiz l’antrènman banna épi la roganiz l’arivé bann mèrsonèr i sort dann tout péi : ziska soisant-dis mil dan lé z’apopré. Assad, ton poi lé o fé ! Mé ala ké Daesh la arvir kont bann l’oksidan - zot la antann z’atanta partou - épi kont lé z’ot mizilman é oila ké la solisyon i dovien in problèm tré dir pou réglé.
Ala ké so kou isi sé Assad ké lé riskab sort vinkèr vi k’bann riss i ède ali pou d’bon. Ala ké mon provèrb i vo sak li vo, in gouni krotin sèk é ala pou kosa mi di « A ouèt ! »