Oté

Lo zé z’olinpik Rio ? La médaye èk son rovèr !

Justin / 23 out 2016

Brésil-la, sa in zoli péi é Rio in l’androi pou révé. Lé zoli la zénès ! Lé éstra lo karnaval ! In kroiyab bann z’atlèt i dépas z’ot kapasité ! Pou in bonpé d’moun in souvnir zot i obliar pa zamé la sérémoni pou komansé é pou fini lété pli zoli ké zamé ! Si tèlman ké o lé touzour a domandé koman l’om modèrn la sort dann kavèrn pou ariv l’androi li lé randi zordi. Poin noir ? Demoun i pans mèm pa, mèm si nana.

Poitan, toulmoun i koné dann so gran péi-la, la droit l’apré fé in kou d’éta politik kont lo parti. I tard pa la prézidante Dilma Roussef, poitan élu par lo pèp i tard pa pou ète déstityé. Par kisa ? Par in kantité z’élu la zistis i poursuiv azot pou détournmann fon. Mèm lo prézidabn ranplasan, li mèm, li nan konm k’i di plis d’in kastrol pou li ralé. Kisa k’i ri dann ka-la ? L’Amérik épi tout lo bann mafia, konm tout lo bann kapitalis i dor dsi matla l’arzan.

Poin noir galman ? Pandan ké la fète i done paké, shak zour dann bann bidon-vil i apèl lé favélas, la polis i tir kou d’bal réèl dsi bann trafikan é atansyon bann bal manké ; atansyo galman si ou lé étidyan, travayèr, pars ou kan lé koinsé rant bann mafia épi la polis bal i vol tout koté é di pa moin ou va gingn pass a travèr.

Poin noir ankor ? La prostitisyon bann ti marmaye. Mé gouvèrnman la pran son réspon-sabilité : li la fé l’anons, prézèrvatif i mank ar pa. Epi in ta d’zafèr mi sava pa fé l’anons isi mé k’i amontr kant mèm, ké ni vé, ké ni vé pa, la médaye isi konm la-ba na son rovèr.


Kanalreunion.com