Oté

Lo zèf èk la poul, kisa la ariv avan ?

Justin / 22 séptanm 2014

Shak ané, lo socrétaria l’ansègnman ék la roshèr i mèt digaz in kou si nout bann z’inivèrsité, partou an frans, pou war kisa nana méyèr ranman, kisa nana méyèr to réisit, é kisa i tir o ki par l’fèt. Donk a nou osi nou té anparmi pou lo l’éspès konkour, lo résilta la tonbé é lé pa bon ditou pou nou, la rényon lé pa kab korésponn èk sa é dizon sé lo pli mové zélèv la klass, 75ème si 77, anshèv di dérnié. Si té falé donn in not soré, zéro kalbass la fimé granbwa. Koman nou la riv la baya ? Esk nout l’ékol lé byin lo bon l’andrwa pou aprann ? Pou bann marmay épanouy ? Tout nout l’ékol, dopi matérnèl, primèr, ziska l’inivérsité. Poitan i dovré èt nout priorité l’ékol. Dan so domèn la osi nout parti na proposisyon. Ni di i fo fé l’akonpagman èk bann z’élèv an difikilté, sak i suiv pa sirtou dann ti klass, rovoir nout kalandrié klimatik, kan i fé sho lé pli dir. Kan i fé siklonn l’ékol i fèrm, i fo nou tyinbo kont tousala. Dopi lo tan nou di, i fo koz kréol èk bann marmay, mé pou sa i fo ké bann l’amontrèr osi i gingn kozé.Ankor dot sijé dan nout program.

I fé rapèl a mwin, kan nou té o kolèz, érèzman na in bon koup dotan, té i interdi a nou koz kréol é banna lavé in tik-tak pou kal a nou. Té i mèt inn ti bèf (in cokiyaz) an sirkilasyon pandan lo kour é shak fwa inn té koz kréol, li té rékipèr lo ti bèf é sirtou lo dernié té pini é li té oblizé fé in pinsomm « mi dwa pa koz kréol dan la klass » é té falé kopié sa 100 fwa. Ala lo rézilta astèr koman banna la gaskongn a nou. Koman banna la tié nout lang dan l’èf. Tonn pa ou si zordi nou na konplikasyon. La fé tout z’afèr pou tinn a nou. Pou tak nout boush. Koman ti vé nou lé promié astèr a l’inivérsité si nou té dérnié avan ?

Dan nout linivérsité ni vé fé lo dévlopman dé pol d’éksélans, nou lé mal anbaré. Mwin la romarké, nou lé souvan dérnié, kisoi po l’inivérsité, kisoi po shomaz, ou sinonsa po lilétrism, pétèt tousala lé anmayé ansanm é sé pou sa nou gingn pa shapé. Mi koné pa ki la fot, si sé lo bann z’élèv ou lo bann profésèr. Ki lotèr ?lé konm z’istwar la poul èk lo zèf. Ki la ariv avan ?


Kanalreunion.com