Oté

« Lyèv i koné son zèrb »

In kozman pou la rout

Justin / 4 avril 2016

Avan rod kosa nout kozman i vé dir ni doi fé la romark bann z’animo la gard in bon rolasyon avèk la natir : zot i san kan mové tan i ariv, zot i koné mèm kèl kalité zèrb i fo pran kan zot nana mové kor. Donk, kan ni di lyèv i koné son zèrb, sa i vé dir li koné kèl zèrb lé bon pou li, lakèl lé pa bon pou li, é kosa k’i ansèrv…

Astèr dann la sosyété kèl plas ni done nout kozman ? Sinploman ké lo moun i koné bien kosa li pé fé, kosa li doi pa fé, koman li pé an tir ali d’afèr si lé nésésèr. Donk ala in bon provèrb an vérité. Ala lo bon kod k’i fo pou nou diriz anou konm k’i fo. Kosa zot i anpans ? Moin sa i bote amoin tou lé ka.


Kanalreunion.com