Oté

Maduro, in shofèr d’kar révolisionèr, i gingn z’éléksion prézidan

Justin / 16 avril 2013

Dann in z’éléksion, nana in ganian épi in pèrdan. Sa lé vré dan tout péi... dan tout péi nana z’éléksion, bien antandi. Dann Vénézuéla, lé parèy : nana in ganian i apèl Nicolas Maduro, é in pèrdan i apèl Henriké Caprilès. Lo promié, sé in révolisionèr mèm parti ké Chavez, l’ot, sé in boug la droit. Konm Maduro la gingn dé zistès, Caprilès i aksèp pa son défèt é li domann i arkont tout biltin inn apré l’ot. Nou va oir kosa va doné. Nou va oir koman lé shoz va tourné.

Lo ganian i di partou li va kontinyé travay Chavez la angajé. Bann z’obsèrvatèr i di li sar blizé konpans désèrtin poin fèb la politik Chavez la améné. Lo pèrdan i kash pa li va bat arièr dsi la politik progrésis améné par lo l’ansien prézidan mor na in moi. Maduro, pou son par, i kash pa d’dir i fo ranfors lo bann bon poin la révolision "bolivariène". Bolivar té in gran révolisionèr l’Amérik di sid la vanj pou kas la shèn té i amar bann péi l’Amérik di sid avèk lo kolonialism bann z’Éspaniol.

Pou lo ganian, moin la pankor tro antann kosa li koné fé. Mi koné li lété minis z’Afèr z’étranjèr, é li la fé avans la koopérasion rant son péi épi la Chine é la Risi. Aprésa, konm banna la shanj la konstitision, li la vni vis-prézidan la Répiblik. Konm lo prézidan té bien malad, li la fé marsh lo bato ziska z’éléksion. Kisa i lé bononm-la ? Sé in shofèr lo kar. Biensir, in révolisionèr la fé son parkour dann parti bolivarien.

Pou kosa mi di sa ? Pars in bonpé d’moun i pans, pou fé in prézidan, i fo li la fé bann gran z’ékol, ou sinonsa li la fé bann métié konm médsin, zénéral, avoka épi d’ot z’afèr inportan ankor. Ni oi zordi nana in aménèr d’kar prézidan. An parmi bann shèf gouvèrnman, bann minis i pé an avoir bann z’agrikiltèr, bann garajis, bann minèr. Pars apré tou, lo diplom i fé pa l’intélizans politik, i fé pa la kapasité pou èt in bon kontab l’intéré zénéral. Sa sé in loson pou nou, konm pou tout bann pèp.

 Justin 


Kanalreunion.com