Oté

Majine in pé, la vi inposib la moityé bann marmay !

Justin / 7 mars 2014

Mi koné pa si zot i suiv bien l’ané éskolèr. Mi koné pa si zot i koné kansa vakans é kansa lékol. Lé pa difisil pou savoir i sifi d’agard lo kalandriyé. Par l’fète mi sort rogard in kou lo kalandriyé é sak moin la vi, mi dé dir azot, la étone amoin in pé. Promyé zafèr, moin téi koné, mé lé bon rafréshi in pé la mémoir : la rantré la tonm lo vin janvyé malgré tout lo fésho ké nana, malgré la plui, malgré sézon siklone. Sa i fé majine amoin nana désèrtin, sanm pou moin, la boir pétrol.

Astèr mi suiv in pé kalandriyé é mi oi na in pti vakans i komans lo sink mars. Zis in pti ropo ! In pti ropo ? Kroi azot sa. Lo pti vakans i fini lo diznèf mars, l’èr lo tan la fine arfréshi in pé. Lé vré in koupir tazantan, sa i fo. Lé vré dopi disnèf zanvyé ziska disnèf mars, sa i fé 2 moi, donk lé bon pou in pti ropo. Dakor, mé koman bann zanfan i artrouv azot ladan. Koman ? Lé pa konpliké : bann famiy sak i gingn i fé travay zot marmay, sansa i pèy lékol o noir, é sak i gingn pa ? Lo zanfan i arèt tèlkesé. apré, parl amoin si zot i vé l’égalité dé shans. Parlé ! Mé mi antan ap zot.

Mi domann amoin si sak i vé sa, la kalkil in sinp zafèr : la kantine. Kan na lékol lo marmay i gingn omoins in ropa "ékilibré", mi éspèr an kantité sifizant, mé kan na poin lékol... kan la famiy na pi larzan pou fé komisyon, kosa k’i spas ? I manz in boushé la kaz gran-mèr, ou sinonsa in famiy ziskatan in l’asosyasion i avans in bazar. Mi koné pa si in pé i suiv amoin bien. kisa ? Sak i mank de riyin, sak na larzan an sifizans... Kèl l’égalité rant marmay ? Kan in pé lo boujaron lé plin é kan d’ot, lo vant i kriy famine konm la fourmi dann la fab La Fontaine.

Si mi di sa, sé pou atir l’atansion bann birokrat, sé pou atir latansion bann zélu, konmsa zot i obli pa la vi inposib la moityé bann marmay nout péi... Pou dir azot, i fo trouv in tik-tak pou sa.

 Justin 

Nb In bonpé marmay la fain, ankor zordi, tazantan dann nout péi.


Kanalreunion.com