Oté

Maloya, ou i mérite bien lo tit patrimoine l’imanité !
Ou lé bien méritan, touléka !

Justin / 19 septembre 2011

Samdi soir, moin lété anparmi dmoun. L’avé in soiré dann in sal lé bien koni koté Sintandré. In klèb foutbal inter-kartyé l’avé roganiz soiré-la. In n’afèr pa si tèlman fasil pou fèr pars i fo ou nana in rézo pou vann biyé, pou roganiz la lotri, pou fé tout kalité démarsh. Boudikont, la nyabou ariv o-bout épi la fète lété bien réissi. Konm di lo kont, kan in n’afèr i marsh pa, i fo dir, mé kan in n’afèr i marsh bien i fo dir ossi. In prèv, kan nana la bone volonté, kan nana la kapasité, lé shoz i marsh. Nou lé kapab, kant mèm !

La mizik té bon... mizik popilèr nou kréol, ni èm sa ! Manzé té bon... manzé La Rényon, bien-antandi ! Lé shoz la spas dan l’ord... nou la aprésyé ! Shak group demoun la rotrouv son bann. Bien bon ! Konm demoun la vni pou lès traka zot mézon, pou obli in pé lé shoz k’i anklav la tète, lé bon ! Nou té parti ziska lo bout la nuit ! In troup jènn marmay l’arivé, pou prézant in bann éskètsh zot mèm la fé. In bonpé d’moun la rir an ékoutan azot. Demoun téi fé réfléksyon ? Ousa bann jenn marmay la aprann zoué téat ? Pou bann jenn in kartyé, lé pa mal.

Toudinkou, konm in kou d’loraz, nou té i atann pa, in pti troup maloya la rant dan la dans. Zot i koné, kan i antann bate maloya, kan roulèr i done, kan kayanm i fé shi-kishi-kishi, bate avèk i sone, demoun i rèst pa asiz, épi la voi lo shantèr é lo kèr k’i réponn. Zot i vien dansé ? Non, inn-dé, mé lo rès lé in pé onté, i rant pa dann ron. Toudinkou, in vré dansèr maloya, la rant dann ta, avèk son pti-pa pti-pa, son mouvman lo bra épi son mouvman dann rin... tout demoun la kriyé pou dir zot i trouv sa doss.

Maloya, ou i mérite bien lo tit patrimoine l’imanité.

Justin


Kanalreunion.com