Oté

Mandéla lé gran : Sé sa son vérité ! Mandéla lé gran étan vivan :
Sé sa son shans !

Justin / 19 juillet 2013

Zot i koné in n’afèr ? Lé pa si fasil ké sa pou répèr in moun inportan dan sak li fé. Dé foi, i fo la pèrsone lé désédé pou k’lo moun i rokoné son valèr… konbien zartis pint la krèv la fin dan zot vi épizapré la vni sélèb étan mor ! Moin la romark sa lé vré pou demoun i sava dann kontrokouran bann zidé dominant. Pou sak lé dann kouran, i diré na poinn problèm. M’a dir azot, pou vréman kan bann fézèr lopinyon, épi bann média, afors zot i répète in n’afèr, afors répété par dsi répété, demoun i fini par kroir zot na rézon. Ziz pi si bann média i pas lo tan a rakont mantèr dsi bann kontéstatèr, dsi sak zot i fé, dsi sak zot i pans, dsi zot projé, dsi sak zot i propoz. Isi, ni koné sa par kèr !

Yèr lété lo zour pou Mandéla, "Mandéla day" konm i di... Koméla, na in bonpé i di, sé in gran bononm ; Koméla ! Mé avan, dann tan li lété dan la prizon, kan li té apré iz son santé pou kas galé, moin la pa atandi bann gran démokrate dan bann gran démokrasi mèt l’Afrik di sid dann tan l’apartèd o défi larg boug-la. Nou, léktèr “Témoignages”, sa té in moun ni koné, si tèlman nou té i parl dé li, nou té i donn son nouvèl é mèm nou té i fé in pé plis ké sa. Mé sak lété an kapasité pou fé in bon n’afèr pou li vréman, kosa zot la fé ? Té pli proférab fé kontra dsi lénèrzi nikléèr, dsi la vant lé zarm, dsi komèrs lo frui épi d’ot shoz ankor... i gingn lo voul la dan. Mé in téroris, konm zot i di sa, in révolisyonèr, kosa i gingn èk sa ? Arien ditou, é sirtou pa sak sé lo bondyé désèrtin moun, larzan.

Donk, si ou i vé oir si in moun lé inportan dann in domèn, i fo ou mèm ou i aprésyé domèn-la. I fo galman ou nana sak i apèl lanpati — konfonn pa avèk la sinpati ! — pou lo moun. Sa i pèrmète aou ète objéktif vizavi la pèrsone, é sirtou, pou ète objektif, alé rosherch la vérité. Kan ou i koné la vérité, l’èr-la ou i pé aprésyé la valèr la pèrsone é donn bann rézon k’i fé ké solon ou la pèrsone lé inportan dan sak èl i fé... Malérèzman, désèrtin nana in lopinyon bien arété, bien fèrm, bien définitif, in lopinyon zot lé pa paré pou shanjé, épi zot i fé pa zot prop kritik. Lé pa konm sa i trouv shomin la vérité... Mandéla lé gran, sa sé la vérité ! Li lé gran étan vivan, sé sa son shans !

Justin


Kanalreunion.com