Oté

Mantèr pa mantèr ?

Justin / 8 séptanm 2014

« Mi romersyé mésyé lo prézidan pou so moman ». Mi koné pa si nou osi nou pé pran sa pou nout cont. Mi sipoz zot la kompri sa sé lo tit in liv i vienn sorti é liv la baya y okip byin lo prézidan, banna i di okipé bon koté l’anvèr. Mi sort ékout in lémisyon dann télé en frans é banna i di lo van i tourn pou nout prézidan. Kominis i rofiz rant dann son gouvernman, lévér y tourn lo do, parti de gos parl pa, son ban dalon y démisyonn, minis i déklar pa zinpo, li lé mol dann sondaz, lo médef i ri soukap, tousala lé pa sifizan, ala son madam i mèt pice si li. I di konmsa lo présidan i èmré pa lé pov, li apelré lé pov, lé sandan é pi pli grav èl y ékri li sé lo rwa mantèr, pou in prézidan de gos y pass pa, èl y rakont tousa dann in liv i vann kom ti pin.

Byin sir tousala y fé désord, nana avan èl té finn di sa, li fé promés li tienbo pa. Domoune y kroi pi ditou, i di lo prézidan la finn vir kazak, li lé pi a gos, son promié minis i fé la fét ek lo médèf é sirtou, sirtou, li di li èm a zot for. Nou mèm, nou mèl pa nout grinn sel, pou se moman nou di pa li lé mantèr, mé osi li la promèt a nou. Li la donn a nou in parol lo promié avril 2012. Mi fé romark a zot, sa la pa in bon dat promié avril, mé lété in moman inportan pou nou. Rapèl a zot sin lui, nou la roswa ali byin, ni tonb dakor si in takon proposisyon, trakass pa, li va okipé. Not dévlopman sé son prinsipal. Lo tram trin lé dann program, lotonomi énerjetik la rénion lé anlèr, lotosifizans alimantèr i donn travail domoun, tousala li lé dakor é li promèt, é kom gramoun i di promès cé dète.

Lo prézidan larive la rénion lo 21 aout an koudvan, ban sindika té rousté, la rès déor, travayèr té bordé si somin, mé la enkor li fé bonpé promés, bann plantèr y atann, la promèt a zot 38 milion pou kann mé tansyon pangar riynk pou 2017 é si l’ érop i vé. La zénès i désespèr é bann domoune la lwa y atann mitasyon en frans li di inkièt pi, pou travay la rénion li di nana kontradavni. Sof son bann kamarad sosialis èk bann boug la droit té satisfé. Pou la droit li la di banna nana bon lintansyon, mèm si po vann la fimé par pint, ou plito vann do lo par tinbal. Gramoun i di ankor la patians i géri la gal, ni atann enkor inn tipé. Si li respèk pa son parol doné, kansréti sak li la promèt é sak nou la tonb dakor pou fé ansanm, alorsse, nou osi nou va di, li sé lo rwa mantèr.
Mé soman si li tienbo pa promès.


Kanalreunion.com