Oté

Mars a pié… lonm la invanté la rou !!

Justin / 13 mé 2014

Zordi nou la fine pran labitid bon pé zafèr ; abitié vélo, moto, loto ; bin la, in ninstan mèt a ou an pane ; pi moto, pi loto, pi vélo, arkomans mars a pié ; sa i fé pans a moin dé troi souvnir mé osi dé troi réfléksyon si nout péi la Rényon.
Mi rapèl kan nou té sort bitasyon, lo swar, té i fo monté ; la ou na bèf po tiin ék la kord, mé sirtou ti mont pa a vid ; si la tèt touzour in paké dboi, in paké dzerb ; mont la pant, fé molé ; aprè in zourné travay, sa lé dir azout ék sa, do lo na poin an kantité…
Rézman do moun la giny domestik zanimo, mèt out paké si lo do lo bèf.

Kan la giny in sarèt, la lété in liks ; matin po dsann, lo swar po rantré fini la korvé port si la tèt, kraz ton kolé.
Do boi a ou, fimié, zèrb …
Nou la minm parti la Ptit Ile la nuit kalvèr si piton ; anfin mi rapèl riink lo dépar, tout trazé moin ladi dormir !
A pié ! Zot i koné la Rényon tout montagn nana ; oui kroi présipis, falèz, santié an kornis i fé pèr domoun nout péi ?
Zot i koné, lontan, do moun Cilaos i mont Dimitil po ni lamour ; do moun Lantrédé i sar Gran basin ; do moun Gran Koud i sar lamour Ros Plat !
Tout fason minm zésklav Piton Rouz té i giny nir rankont sak léo Sinzozèf po mèt ansanm in plan datak !

Kouék sé, po zot, in désant la Ros Ekrit po mar a Martin ?
Bann Sint Sizane i déboul dann fon La Rivièr dé Plui ; moun Bra Fuzi i sar plant zafèr dann ranp Salazi ; si santié la poin i fé lo santié : pod moun, po zanimo ; pli tar po sarèt, kariol bourik.
Kan oui rogard la Rout la Montagn, ou lé oblizé pans lo zéni, lintélizans nou bann zansèt ; limazinasyon lavé zot !

 Justin


Kanalreunion.com