Oté

Mayotte ? Gouvèrnman La frans i amenn sa konm in fatra

Justin / 23 mé 2016

Tout sak i lir nout zournal i koné Mayotte-la, sa la pa in gran réjyon : solman 374 km² (konm 2 pti komine La Rényon) pou in popilasyon 200 000 pèrsone a popré é ankor la pa sir pou toulbon si tèlman nana in bonpé d’moun la vol shomin pou zot rod in vi méyèr. Astèr ni koné ké l’ané 2050 nora 540 000 pèrsone dann réjyon-la. Ni pé di ankor zordi na plis 500 pèrsone par km2 é l’ané 2050 nora plis 1300 pèrsone par km2. Z’ot lang prinsipal sé lo shi-maoré, z’ot prinsipal rolijyon sé l’islam. Mayotte sé in départman fransé é bien antandi lo péi lé pa dévlopé konm k’i fodré.

I pass pa d’zour san k’in zélu, osinonsa in sindika, ou bien inn-dé pèrsonalité i domann lo gouvèrnman pou pran prékosyon pars pou zot lo péi lé dsi lo bor la guèr sivil. Rant ki é ki ? Rant bann mahoré par la nésans épi bann komorien sak la désid kit shé zot pou alé Mayotte. Rant ki é ki ankor, rant bann maoré épi lo l’administrasyon kolonyal. dizon in péi dsi lo bor l’inplozyon-miné par son bann kontradiksyon dan li mèm. Sanm pou moin bann maoré téi pans avèk la loi départman z’ot réjyon nora marsh a pa kadansé diréksyon lo dévlopman. Mank de po, la pa konmsa ké lé shoz i marsh.

Dann tout sityasion i fo in boukémisèr-in group de moun pou fé port la résponabilité tout traka i ariv. So foi isi sé bann moun i sort dann bannzil Comores. Ala ké bann maoré, dann désèrtin vilaz, la désid bril lo banga bann moun zot i pans sé dé z’étranjé é dopi troi zour é troi nuite lo bann moun la pèrd z’ot kaz i dor dsi la plas piblik an atandan ké lo gouvèrnman i rod in kaz pou zot é bien antandi la kaz la poin ! Bann z’éspatriyé la pèrd konfyans : plis 750 pèrsone la domann l’éta d’ramène azot l’androi zot i sort... Pli pir dann tousa sé ké lo gouvèrnman La Frans la pa pran lo bann mézir k’i fo pou asir la trankilité d’lo-moun.

Na in solisyon pou so problèm-la ? Avèk lo zistoir an kouyon k’i éspas la-ba, kont pa dsi moin pou mète in pé d’klarté la-dan. Bin sa la pa prévi don sa ? La prévi konm pa. Tout fason é gouvèrnman fransé i amenn sa konm in fatra mèm si, d’apré sak mi antan, gouvèrné sé prévoir é pou prévoir la pa prévi inn-tyor !


Kanalreunion.com