Oté

Mèm konsidéré konm mor, li trakas azot alor !

Justin / 1 févrié 2016

I mank pa d’somenn, dizon i mank pa d’zour, ké ni antan pa dir dann bann gran médya épi osi dann la popilasyon : Parti kominis lé mor, I rès zis pou antéré. Sé l’èr ké tout bann gran doktèr, i poz z’ot stétoskop dsi l’éstoma dé sak souvan dé-foi la pa la, pou dir kèl sé lo maladi, si lé mortèl si lé pa mortèl, si na in romèd pou sov ali, osinonsa si na poin, é si lé posib prévoir lo désé, an moi, an somenn, pétète an zour… Nou k’lé dodan, nou na nout l’idé mé ni sar pa diskit dé sa, zordi.

Sak la kite lo bato lé invité pou donn dé nouvèl frèsh par l’intéryèr : moin la viv dann kèr lo monstré é mi koné son z’antray !! Na mèm in pé i pans zot i pé roganiz in kou d’éta pou donn lo pouvoir Huguette Bello san savoir si sé in n’afèr k’i intérès aèl pou vréman. Pars moin pèrsonèl mi pans solman ké solon èl, la bète lé atèr, é i fo tir kouto pou piké. In poin sé tou !

A partir d’ tout sak mi oi épi tout sak mi antan, moin lé a d’mandé pou kosa se bann moun kalifyé l’apré pèrd z’ot tan pou bate la lang konmsa ? Na mèm in rédaktèr an shèf, avan ké li kite son prop bato, k’i ménas koulé, somenn proshène, li donn son prop dyagnostik. Pars li osi li la donn, konm di La fontaine, son kou d’pyé bourik dan l’afèr.

In sinp késtyon mi poz amoin : si lo PCR lé mor, la pa bézoin fé tousa l’antrak-la, in kou d’lo bénite épi lé bon ! Non, zot i diskite, i dispite, i sobat i sobatkoz, i fé la psikolozi pti somin gran somin, i dyagnostik i rodyagnostik, doktèr tanpi i afront doktèr tanmyé. Pou kosa tousala ? Mèm konsidéré konm mor, li trakas azot alor !


Kanalreunion.com