Oté

Mésié lo promié miniss, astèr, ariv’a vou

Témoignages.re / 9 juin 2015

La Rényon lo 9 zwin 2015
Justin i ékri Mésié lo promié miniss.

Mi sava ékri a ou in lèt mésié lo promié miniss, mi pans ou nora lo tan lir a li. I prétan ou tard pa pou arivé, Zédi mi krwa. Avan tousala mi pérmèt a mwin anvoy a ou dé trwa mo pou inform a ou si sak i éspass isi. Pétèt ou lé déza o kouran vik, néna d’moun i dwa donn a ou lo grin pou moud. Mi anvoy a ou sa a mon manièr, èk mon kozé, mwin lé sir ou va konprann vik ou sé in boug gabié. Mi parl pa ou létat nout péi, ou dwa konèt ? Shomaz, la jénèss, nout lékol…… Mi vé parl a ou si sizé brilan di moman. Déza, vik ou vyin èk la miniss dé lédikasyon nasyonal, mi profit pou domann zot dé kansa é koman zot i kont pran an par nout lang, sak zot i apèl laba déor la lang rézyonal ? Nout kozé kréol boudikont, nout kozé la kaz, lékol dann bitasyon, nout kozé tou lé zour. Palfèt pou nout lékol, misié lo promié miniss, plito pou nout liniversité, ou koné nou lé avan dérnié si tout la franss ? Bann marmay i di nou lé promié par la ké. La réform si lékol osi, i prétan i pas pa. In ot sizé osi i trakass a nou an so moman sé nout sékirité. Ou koné konm la ba déor a nou osi nou néna marmay singlé i sava fé lo djihad la ba an Syrie, i prétan in pé i sava èk la kontinité téritoryal la rézyon ziska la Frans, aprésa i pass par la Tirki pou alé an Syrie o bout. Ni kont si ou mésié lo promié miniss pou mèt do lord anndan la. Ni kont si ou osi pou argard in pé bann fonksyonèr i vé rantr dan zot péi, la osi i tourn touzour pa ron i di malgré lé promèss nout prézidan. Konm ou wa néna sizé sho an so moman.

Ni profit pou an parl a ou konm promié miniss déza, vik in pé i di konm sa pétèt domin ou pé èt présidan, ni pran in pé lavans. Alorss in dérnié zafèr, in lindikasyon plito, si ou désann dan lo sid, odrémié pran la rout nasyonal an ba konm sa ou va war landrwa banna i vé fé lo dé gran trou karyèr pou la rout litoral. Ou va war par ou minm, lé zis koté la ravinn di trou la minm. Fo absoliman évit so dé boubou la misié lo promié miniss. O rotour ou pé ropass par lé o konm sa ou va aprésié lot rout an o, la rout tamarin.

Noré tro pou di, mé, ala an dé trwa mo apopré sak mi voulé an parl a ou misié lo promié miniss. Mwin lé sir kou va pran an kont, ké ni pé kont si ou. Konm di mon lantouraz a mwin, astèr “Ariv’a vou“.

Ek tou lo réspé mwin néna pou ou misié lo promié miniss.


Kanalreunion.com