Oté

Mésyé Lurel, obli pa diskour Sin-Lui !

Justin / 10 novanm 2012

Mésyé Lurel, d’apré sak mi antann dir, i vien bat in karé La Rényon. Avan li la pran l’aviyon, li la fé in déklarasyon pou bat tanbour dsi sak li fé par rapor sak d’ot la pa fé avan li. Si moin la bien konpri ali, si bann péi l’Outre-mèr lé dann malizé zordi, sé par la fot lo projé "dévlopman andojène", in projé, d’apré li, « fumeux » épi « funeste ». Donk, té pa tro posib oir klèr dodan lo zafèr épi la port anou la movèz shans.

Donk, si mi konpran aou bien, mésyé Lurel, projé l’ansien Prézidan Sarkozy pou bann péi l’Outre-mèr lété in mové projé. Pa arienk pars lo projé té mal apliké ! Pa arienk pars l’avé poin lo moiyin k’i fo pou bien aplik sa ! Pa arienk pars té i done in rol tro gran l’Éta lokal — in préfé k’té i anfoutsa. Mi pans ! Pa solman pars bann minis té i doi aplik lo program la anvoy ali baladé ! Pa solman pars Madam Penchard, minis l’Outre-mèr, la konpri arienk in n’afèr dan lo diskour 6 novanm 2009, sé k’èl l’avé gingn in promosyon konm minis é èl la obli lo réstan ! Pa pars lo préfé dann tan-la épi bann minis gouvèrnman té okipé in sèl z’afèr, fé pèrd Paul Vergès lo zéléksyon 2010... aprésa, zot la èd Didier Robert kas sak Paul Vergès la fé. Pandann tan-la, bann kamarad sosyalis mésyé Lurel, kosa zot la fé ? Zot osi, konm di la fab La Fontaine, la done lo kou d’pyé bourik. Souvien aou dézyèm tour zéléksyon réjyonal !... Moin la bien antann aou mésyé Lurel : Pou ou, l’idé lo dévlopman andojène té mové, mové an li mèm... fumeux èk funeste ! 

Astèr mésyé Lurel, ou la bien antann, mi éspèr, sak François Hollande la di dann diskour Sin-Lui. Mi pans ou la bien antann lo prézidan anparl bann gran shantyé, anparl lotonomi dan l’énèrzi, anparl tram-trin épi invit bann Rényoné pou pran zot résponsabilité, dan landroi la tèr zot i lé. Si ou la antann sa, moin na l’inprésyon ziska zordi mi oi pa kosa ou la fé pou komans fé aplik program Sin-Lui. Poitan, sa i intérès nout dévlopman pou vréman ! Sa la pa in kotèr dsi in janm de boi ! Boudikont, mésyé Lurel, pétèt diskour Sin-Lui, sa i arsanm pa, kansréti in pti pé, dévlopman andojène ? Sa i arsanm pa in pé bien lo dévlopman otosantré ? D’apré ou, sa i dévir pa in pé lo do èk lo konsèpt “Péi bato fou” ?*.

*"Mon péi bato fou", in shanté Ziskakan — Axel Gauvin pou lo paroli, in shanson i dénons l’asimilasyon épi l’intégrasyon.

Justin


Kanalreunion.com