Oté

Mésyé Lurel ? Sa lé kont nou, sa !

Justin / 23 désanm 2013

In zour, li di, i fo bann rényoné i dézabityé avèk la kane. In zour li di i fo bann rényoné i fé in bonpé kontra l’avnir konmsa i fé in bonpé travay. In n’ot zour li désid fé sak li apèl, par li-mèm, lo panyé Lurel pou pa tro dépansé. Avansa li tonm dakor pou siprime lo rsta. Arzout èk sa li fé in dékré pou réglomant lo pri lésans : lo zafèr lé tèlman an bruiyé ké pèrsone i koné pa ki ki pèrd, ki ki gingn… plito toulmoun i mazine zot i anpèrd dann so z’afèr-la.

In dalon la di amoin i fo pa kroir sé Lurel k’i désid tousala, sé plito lo gouvèrnman apré raz anou a sèk, konmsi Lurel té pou arien dodan. Si li lé pou arien, i diré kant mèm li défann a-mor son bann prozé pou l’outre-mèr. Tout fason li lé pa oblizé d’ète minis, li pé shapé é li sar pa pli vilin pou sa. Mèm ké sanm pou moin in pé d’moun lé riskab bate la min. Donk fransh vérité li lé bien dakor avèk sak i fé, é tan pi si i raz nout pint, sirtou ké solon li gouvèrnman i fé in bon politik, é la réisit sar o bout lo shomin. Ki vivra véra, kroiyé moi si zot i vé, mé lé pa oblijé.

Provi k’ tout i fé pa konm lo panyé Lurel. Akoz mi di sa ? Pars konm di lo kont, bon marshé i kout shèr. Sa lé bien vré ! Pars kosa ni sort aprann ? Ni sort aprann lo panyé Lurel lgoumant trant pour san, é trant pour san-la, sa in n’afèr i kout shèr sa. Lo panyé bon marshé i kout pli shèr ké lo pri bann marshandiz normal... Lé ga, pétète zot va kroir mi égzazèr, mé mésyé Lurel la, sanm pou moin, sa lé kont nou, sa.

Justin


Kanalreunion.com