Oté

Mète nout matyèr griz an mouvman, sa lé bon pou nout dvlopman dirab !

Justin / 18 out 2011

Moin la antann in zournalist apré di, la Frans avèk l’Almagn sé lo dé pli for pilyé l’ero. Moin la antann in n’ote apré di, sé l’Almagn lo pilyé la zone ero. Shakinn l’avé son l’opinyon réspéktab. Mé moin la antann dé-troi z’afèr dési in péi épi dési l’ot. Sa la pa in l’opinyon vi k’sé in n’afèr i pé trouv dan bann éstatistik lé dé péi, é i fo sinploman kon-te lir pou trouv z’afèr konmsa. La Frans nana dé foi plis l’antropriz ké son voizin, mé l’antropriz son voizin lé an moyène dé foi pli gro ké lé-syène. Anplis ké sa, dann la Frans nana bonpé plis l’antropriz sèrvis, alé oir son voizin nana in bonpé plis lantropriz indistriyèl. Arzout èk sa, bann z’antropriz la Frans, konm di lo kont, i mord lo ki inn-a-l’ot, é bann z’antropriz l’Almagn nana l’abitide a travay ansanm kan lé posib.

Mi pans, la-dan nana in bonpé loson pou tiré, in bonpé légzanp pou an avoir pou nou, bann péi l’oséan Indien. Sirtou kan nou l’apré rode in voi pou nout dévlopman dirab dann lo tik-tak lo ko-dévlopman. Koman sa ? Bin oui, si ni rode in modèl lékonomi pou nou, mi pans séryèzman, ni doi shoizi plito bann lantropriz pou la prodiksyon bann marshandiz, kisoi dann l’agrikiltir, kisoi dann la pèsh, kisoi dann bann lantropriz transformasyon, ou bien ankor lindistri la konésans... san oubli viz léksélans dann sak ni antropran.
Ala pou kosa ni doi profite léspéryans lé z’ote, shoizi bann bon légzanp é, bien antandi, anvoy dingué toute zégzanp sak lé pa bon, épi sirtou pars lé in pé tro an somèy sé tan isi, mète an mouvman nout matyèr griz. Sa lé bon pou nout dévlopman dirab.

Justin


Kanalreunion.com