Oté

« Mète son mari sou zoryé » - in kozman pou la rout

Justin / 6 zanvié 2016

Ala in kozman moin la trouv rarman-dann in tèks Patrice Treuthardt nana sa : « son momon la di ali mète son mari sou son l’orié ». Kosa sa i vé dir ozis ? I pé an avoir dé sanns . Inn i vé dir, vi k’ou i èm komandé, ou la pa bézoin out mari ou n’a ka kashyète ali. Akoz sou zoryé ? Pars zot i koné désèrtin moun i èm kashyète z’afèr sou zoryé konm in linz de nuit par ébzanp…

Moin la di konm in linz de nuite : sa i done amoin in l’idé. Linz de nuite i ansèrv la nuite, konm lo mari solon sak la bèl mèr i di na poin la parol dann rien la zourné i fo ramas ali sou zoryé, pou la nuite, pou ansèrv sak zot i koné. Dézyèm sans : lé pa tro loinn lo promyé…

Mi an souvien an avoir antandi in n’ot afèr. Ousa ? mi rapèl pi mé sak moin lé sir sé k’in matrone l’avé konsèy son fiy pou fé rès son mari trankil bien okip ali dan la nuite, konmsa li sava pa rode déor sak li nana sou son toi épi kisa k’i koné pétète lo fiy i pouré konmsa, domine son mari.

Mi vann sa konm moin l’a shté é zot, kosa zot i anpans ? Arien ditou ? Fé travay z’ot koko ! Fé bouy z’ot matyèr griz ! Zot va oir ké, rant-rant, ni pé z’ète, tazantan, dakor rantre nou.


Kanalreunion.com