Oté

Méyèr program, sé sak lo prézidan ! Plis lo kontra nou la sign avèk li !

Justin / 21 mé 2012

Mi sort antann dann radyo, nana soisann-dis kandida pou z’éléksyon dépité isi La Rényon. Kan lo z’éléksyon sar fini, va rès sèt, sèt dépité pou roprézant anou. Pou in péryod sink an. Si Prézidan na son pouvoir, si gouvèrnman nana la syène, si la Frans sé in péi désantralizé, si dan désèrtin ka i fé référandom, la plipar d’loi sé kant mèm bann dépité épi bann sénatèr k’i vot, é rant lé dé — l’Asanblé nasyonal épi lo Sénat —, sé bann dépité nana lo dèrnyé mo si na konm in dézakor. Sé dir si lo z’éléksyon lé inportan.

Lé inportan pars i fo bar la rout la droite épi lo Fron nasyonal, pars i fo pèrmèt lo prézidan aplik son program sansa i sèrv ar pa arien si la mèt anlèr in prézidan la gosh. Prézidan-la la di li sava pran soisant mézir pou la Frans an zénéral, é nout kamarad Elie Hoarau la bien di lo program lé ankourajan. Aprésa, li la di li sava aplik trant mézir pou bann péi l’Outre-mèr é dizon sa i bot anou. Arzout èk sa, kan lo kandida Hollande la vni La Rényon, li la profit li lété Sin-Lui pou anons in bann mézir, tout té i sort dann program nout Parti kominis. Donkalor, pou nou, tou sa la sé lo program lo Prézidan pou La Rényon.

Mé kisa i pran tout so program-la an blok ? Sak i kroi program-la lé bon san pour san. Mé pou di la vérité, nana arienk bann kandida kominis va nyabou port program-la épi fé mèt ali anlèr par gouvèrnman. L’istoir la amontr anou, pou in pé, in l’angajman sé konm in sui-pyé. Zot i kas pa la tèt pou lo pèp rényoné si sèt-la i pans lé bon pou La Rényon. Souvan dé foi, zot lé okipé amèn in politik dann mové sans lo mo... par égzanp mèt Parti kominis aznou. Sa lé vré pou in bonpé kandida sosyalis, sa lé vré pou l’éspès kalité mouvman madam Bello la fé la-ba Sin-Pol. Donk i vo ni méfyé ! I fo pa nou lé pri dan la min korbo !

Z’éléksyon réjyonal 2010 i doi ansèrv anou konm loson. Nou ni vé dévlopman La Rényon, mé in pé i vé arienk abès lo péi, kas son bann moiyin épi kontinyé mèt ali dann fénoir. I fo ni di, pars lé vré, lo sèl program i vo la pèn, sé lo program lo prézidan, tout lo program san mèt dé koté lo program dévlopman nout Parti kominis. San mèt dé koté lo kontra lo prézidan la sign avèk nou !

Justin


Kanalreunion.com