Oté

Mi èm pa travay pou la po patate !

Justin / 5 avril 2011

Dépi promyé avril, bann Rényoné, sak i vé, nana lokazyon done zot l’opignon déssi la route litoral sis voi. Sé l’okazyon pou di oui, pou di non, pou di pétète, pou dir somanké, pou dir si sé in bon n’afèr, sansa si la pa in bon n’afèr.
Promyé z’afèr mi romark, sé k’i domann demoun koz la boush rouvèr, koz san konprann lé shoz. Pou kossa mi di sa ? Pars, pou sinplifyé, Konsèy réjyonal la déside fé in moityé la rout dann milyé la mèr é in moityé kosté sanm la tèr, mé i di pa nou kossa nana par déssou, dann fon la mèr. Si, par égzanp, nana in gran ban koray, é si ban-la i doi z’ète réspékté pars i fo réspèk la biodiversité dan la mèr, l’èr-la i fo pa kass ban koray-la… donk i domann amoin z’ète konplis in krime kont la natir, é sa mi vé pa. Si, par égzanp, nana inn-dé gran ban la sab, é i fo fé in bann piké in grandèr inkroiyab pou trap la rosh dir, moin lé paré pou di : "Tansyon pangar !".
Mazine ankor, si i fo milyon par dsi milyon galé, gravyé, lo rosh frakassé pou fé in gran dig pou siporte la route, koté ké li lé kosté sanm la tèr, é si issi na poin. Mazine azot, bann débri-la, i trouv pa sa sou la pate shoval. Si la poin an sifizans La Rényon, l’èr-la v’alé rode sa la-ba Adélaïde ; É Adélaïde, sa la pa la porte a-koté ! Ankor si té i sa rode sa Madégaskar, moin té riskab ète pour. Mé toulmoun i koné la majorité Konsèy réjyonal lé alèrji sak i sorte Madégaskar, moin sré plito alèrji ansanm Adélaïde, mé karnaval, shakinn son bann ! Donkalor, nou lé riskab pa an avoir lo mèm l’opignon.
Pli pir, m’a dir azot pou kossa mi pé di non ? Pou dé rézon. Promyèr, sé ké mi ashté pa in sha dann in sak, é si mi koné pa lo fin mo, mi done pa mon l’opinyon. Sé lo ka pou la route-la !
Dézyèm rézon, mazine in kou la majorité Konsèy réjyonal i shanj, é lo nouvo majorité i vé fé in route uit voi, sansa artourn fé in rout kat voi, moin nora done mon l’opinyon pou la po patate, é mi èm pa travay pou la po patate.

Justin


Kanalreunion.com