Oté

Mi éspèr li kroi pa sa, pars li lé riskab manj patat avèk la po !

Justin / 1 zwin 2015

Zot i koné, isi la Rényon nana bonpé d’moun lé pov. Dann la povrété, nana osi la mizèr-in pé i di sa sé la povrété. Mi souvien, dann tan moin lété marmay l’avé dmoun si tèlman mizèr ké té i azout sa avèk z’ot nom : intèl la mizèr ! Mésyé la mizèr ! Madam la mizèr ! zanfan la mizèr. Mi rapèl bien mon papa lété in l’adzoin doktèr Vèrgès, é li té i di anou, avèk départmn fransé la mizèr va disparète é nou té i antour ali pou li anparl anou La rényon san la mizèr é nou té i rèv de sa.

Lo tan la pasé é moin téi kroi la mizèr téi sar disparète avèk l’alokasyon familial, vaèk la rotrète, avèk bann z’avantaz sosyal. Mèm in zour l’asédik l’ariv isi. Donk nou l’avé pran in bon shomin ; élas, ménélas mon kèr é an filas, la mizèr l apa disparète san pour san : i si mèm nana ankor près vinn pour san d’moun dann la grann povrété. Kanas li va disparète alor, mi koné pa ! Biento l’èr pou aval mon kiyèr v’arivé é mon rèv timarmay sar pankor réalizé.

Mésyé holland l’avé di li sava siprime sa, mé li la fine fé sontroi z’ané. L’ané proshène sar son katriyèm l’ané. Aprésa son sink z’ané sar fini é la mizèr sar la ankor. Mé pétète mi sousyé amoin pliské li dsi sak i apèl son l’obzétif. Pétète mi kroi tro sak i rakont kan i rakont bon n’afèr ! Pétète li nyabou plonj amoin dann mon rèv épétète li di li va nyabou roul in bonpé dann la farine. Mi souète pou li, li kroi pa in n’afèr konmsa, pars si sé sa, li lé bien riskab manj patat avèk la po.


Kanalreunion.com