Oté

Mi éspèr o moins, manzé té bon !

Justin / 20 août 2011

Na dé zour d’sa, nout ti prézidan la koup son vakans pou in rényon-manzé avèk madam Merkèl, shansolyèr l’Allemagne. I prétan dir, tou lé dé té i sava éstope in pé la kriz la bours. Dann télé, lété gayar fason banna la amontr sa : in sékans Sarkozy apré mont vélo konm in vré kourèr siklis Zé dé zil, in sékans li lé ansanm la shansolyèr, rède konm la zistis déyèr in biro, apré fé zot diskour épi ésplik zot projé pou l’Erop. La di "projé", mé la fé konm si té in désizyon paré pou pran. La kome lé konm sa : kan ou i kroi la fine pran in désizyon, lé zis apré kass la blag dési.

Kèl projé zot la anparlé : in fitir gouvèrnman pou lékonomi l’Erop, in l’inpo dési komèrs larzan, lo famé règ an or pou prézant bann bidzé an ékilib. Pou lo promyé z’afèr, sa i fé pa konmsa, i fo travay dési, é kan sar fine pare, bann dépité tout péi la zone éro va voté. Dizon, pou la sin-Glinglin ! La taks dési komèrs larzan ? Sa va gingn fé kan tout péi sar dakor... donk, la pa domin la vèy. La règ an or ? ay ! ay ! ay ! mon dyé ségnèr, dizon lé mor avan son nésans. Mé la pa abord in késtyon in pé tout péi té i atann : lé éro-obligasyon. Kosa i lé sa ? in n’afèr sinp : tout la dète bann péi l’Erop va gingn la garanti l’Erop. Donk in péi nora pa rès tousèl pou sèy tienbo lo rin kont bann éspékilatèr. Konmsa bann péi konm Chypre, Portugal, l’Irlande épi la Grèce épi d’ot ankor nora gingn tout la zone éro konm zarboutan. Ini konm sink doi la min, ou lé forséman pli for !

Sarkozy la pa anparl de sa ! Li la fé konm martin kikouzi. Madam Merkèl la di, pou son par, sa la pa in bon z’afèr pars i ankouraj bann péi i fé pa lo zéfor ki fo. Zot i parl solidarité éropéène ! Zot i parl la grann famiy l’Erop ! Plito in bann lé paré pou larg inn-a-l’ot promyé kou d’siklone. La pa manké, konm di bann zournalis, la bours la plonjé, la pran lo fon ! — la dévisé — la d’sann, la d’sann, la d’sann, l’ariv o fon. Mésyé lo prézidan, lété pa bézoin koup out vakans pou sa ! Mi pans ou nar pa fé arien, nar pa shanj lé shoz. Mi éspèr o moins, manzé té bon !

NB : Martin : merl lé Karaïb. Martin kikouzi : i ariv pi kozé pars, d’apré sak i rakont, in marmay san pityé la koud son fonnman.

Justin


Kanalreunion.com