Oté

Mi éspèr, touléka, in pé solman va rèss dann fénoir !

Justin / 4 mai 2010

Moin la antann, so matin dann radyo, shikoungounya son viris lé ankor la. Moin la antann galman dir, si i porte pa prékosyon, lo l’épidémi va artourné par-la moi d’séktanm-oktob. Sa i fé pans amoin in n’afèr. Sa i rapèl amoin nana d’moun i di, ankor zordi, la pa moustik l’amène maladi-la, pars kan zot té pti, dann bor l’étan, gran-gran maringouin la pik azot épi la pa fé azot aryin… épi, ala ké va rakont zistoir kadav dann bato, lèr anpoizoné, épi sirtou va anvoy dingué toute kalité konsèy...
Donk moin lé a d’mandé si sé nout déstiné, prann po d’shanm pou pla kouvèr, makaroni pou la bouji… donk, si lé initil baz anou déssi la rézon pou amène nout vi é pou asplik in n’afèr nout bann konpatriyot. Na in dalon la ésplik amoin sa i ansèrv de riyin baz déssi la rézon.
Moin pèrsonèl, mi kroi dann la syans, mi kroi dann léspérimantasyon… mi pans konm in pé, aryink la vérité lé révolisyonèr é sé la vérité va fini par gagné in zour. In zour ? Mé an atandan, la mansonjri, le fé-noir, la kouyonis, malérèzman, zot va kontinyé maye in bon pé dan lo fo, dan l’érèr, dann lo boush-lo-zyé. Mé sa i doi pa dékouraz anou, kontinyé ésplik lo vré... kontinyé byin ésplik lo vré. Pars in n’afèr, souvan dé foi, lé mal konpri kan li lé mal éspliké, é i pé di sé in pé la fote sak la éspliké si i konpran pa li. Arzoute ankor si li vé pa donn ali la pène éspliké… dé foi, sa i ariv.
Apré sa, konm di in gran bononm, byin manipilèr li ossi, i fo donn lo tan lo tan (donner du temps au temps !). Soman, antansyon ! Moin lé sir, in pé va touzour pans la tèr lé plate, sansa lé kré, mé par anndan, é nou lé dann bèl boul-la, la pa moustik i donn shikoungounya, patati é patata… pou ète in onm, i fo lèv lo koude… étsétéri, étsétéra, la ké lo ra. In pé ? Mi éspèr, touléka, in pé solman va rèss dann fénoir.

Justin


Kanalreunion.com