Oté

Mi giny pa dir ali : « produi dabor, konsome ansuit »

Justin / 24 juin 2014

Moin na in gran kamarad ; bon li lé pli zinn ke moin, mé kan minm, konm li komans frékant a moin, anfin mi di amoin, mi devré dir anou, nou, nout grand fami o parti kominis rényoné ; li rant din sistèm, in organizasyon ke na in gran réfléksyon si pa mal zafèr dan bokou ddomèn, ékonomik, sosial, kiltirèl, minm finansié…

Bon pason si lé détay. Mé moin na biinto dé zan moin la po okip in térin ; lo térin lé tro gran po moin ; mé dousman dousman, mi arash zerb, mi koup lo piéd boi, mi bril, mi mèt in koté bann ros, é nana lo gro é lo pti, mi rod pios, la pik ; ziska tronsonèz moin la asté, la ash moin la fé arbat par in tayandié, forzeron.
Oté, na travay dan in bitasion ; po ou giny in zépi mayi, i fo ou fé koul lo transpirasion, lé pa doné ; minm in chouchou, i fo mèt antèr, véy a li si li grinp, anlèv mové zérb-dan la bib i di séparé livré du bon grin-.

Zordi, si moin na dé troi gous zantak ; in pié zanbrovat lé bon po rékolté,sa la pa ariv tou sèl.
A koz mon kamarad, si mi di a li, viin bonèr, ma montr a li koman mi travayi, koman moin la rorganiz sak mi rékolt zordu, sa na in débu, in déroulman, in lantrotiin, sa i fo véyé, i fo suiv a li toultan …
Ti viin pa war koman mi travay ???…
Mé ti giny rékolté lo chouchou ;lo brèd payatèr…
La ti ariv ziska ék ton fami, frèr, bèl –sèr, niès ék loto si ou plé, -bon, lé vré, prinsipalman té po war lo bann kabri pétèt i fodré tié é vann par kilo, si i giny pa vann lo troupo sir pié !?-
La ti anminn tout la band war mon bann brèd blé, mon kristofine… Rèzman lo wouèm lé pokor bon, ni lo pastèk, lo sitrouiy, lo konkonm ; sinon, ou kab manz avan moin !?
Produi dabor, ta konsomé aprè !…

Justin


Kanalreunion.com