Oté

Mi komans par rogarde an promyé sou mon soulyé !

Justin / 17 zwin 2010

Zot i koné, dann la kour lékol, bann marmay i shante, i fé danse-rone, sansa konm i di dan la Frans, i shante bann kontine… souvan dé foi in pé limite-limite, mé i pé pa di zot lé boush sal. Mi souvyin ankor inn, pars sé pa si zot la romarké, mé sak ou la aprann kan ou lé pti, sa i rèss dann oute mémoir, lontan mèm. Donkalor, mi rapèl inn té ki di konmsa : « Promyèr poul la kakayé, èl mèm la ponn zèf pouri ! ».
Pou kossa mi pans sa, zordi-la ? Na poinn rézon ! Na poinn rézon ? Si nana inn. Mi sorte lir dann zournal la sou-ministrèz Léspor, mamzèl Rama Yade, son sèrvis l’avé rotonir pou èl in shanm l’otèl dan l’Afrik-di-sid té i koute 667 éro la nuite. Lé pa mal ! Lé sirtou pa mal, pars la sou-ministrèz l’avé krétik lékip foutbal la Frans, vi k’zot l’avé pran bann shanm l’otèl té i koute 550 éro é kèk la nuite.
Moin pèrsonèl, mi oi pa tro la diférans rant inn é l’ote. Moin noré anvi d’dir lé dé lé égzazéré.
Solman, kan ou i kritik in n’afèr, ou pran prékossyon, pars tansyon pangar, konm di bann z’Australien, tansyon lo boomourang i artourn épi i kass oute figuir.
Na in n’ote kozman i vyin dann mon pansé, sé sète-la : kan i san mové, mi komans par rogarde déssou mon soulyé pou oir si sé pa moin k’la marsh dan la shans.

Justin


Kanalreunion.com