Lakey lo sit > Chroniques > Oté
Mi koné pu ou sa moin la perd mon klé loto
samdi 7 zwin 2014, sanm
Mi kroi lalzaimeur lo po rantré. Mé rien ! I apèlsa lé zinprévu. Or, rien i ranplas in klé loto ke lo doubl la minm klé ; kan ou asèt in moto, in loto ou in kamion, kélke soi lo masine i livr a ou ék 2 klé !
Lot zour mi ariv si lo Por dézèr laprémidi, mi akos mon loto koté légliz Jeanne d’Arc, mi férm a distans (klik !).
Si lo ban mi manz in chouchou bouyi i sort ma kaz ; moin la fé 100 kilomèt ; li fine rofroidi, mi asiz si lo ban an fas la kroi Jésus-Christ…
Mi rant lokal Témoignages (parlfèt nout zournal) ; mi lav mon figir fas in glas, i fé cho , mi fé in travay si lordinatèr din piès.
Lo soir na in rényon din sal ; mi déplas po fé in kafé din not sal ! Mé rénion la fini, moin la giny liv si Chagos po distribié ; minm trak po manif po done mon bann kamarad séksyon.
Mi ariv koté loto, mi dépoz mon karton, rod lo klé dan mon sak, oki.
Artourn partou ou sak moin la pasé,la poin.
Bin, rézman mon vit lé kasé dérièr, a moin sé désid dor dan loto.
Lo matin, gran matin bonèr, alon pran kar jone, alon artourn la kaz sers so déziinm klé !
Dann kar, ou fé kalité rankont ; na ziska in fanm zaviron, mé romark él la prévnu té son aniversèr : mi sar voir mon bononm sin lui, boir in kou, tir in kou !
Rézman sofèrtkar la i di a él : « madame, kalm a ou, nana d zanfan dan lo kar !
- Ekskizé-moi mésié »
Rien, moin la rankont osi YVDE, zot la oublié in ansiin zournalis Témoignages, li té pran lo kar ant sinpier é tanpon po voir in kamarad.
La kan mi ariv, promié zafèr, done manzé kabri ,aprè pran doub klé-la artourn lo Por, sa in zouné ris an évènman !
Mi koné pu ou sa moin la perd mon klé loto ; mé kèl avantur zordi tout la zourné !
Justin
Bann modékri andann forom
8 zwin 2014, 15:19, sanm titienne
Lavé poin in kamarad pou sokour à ou ! kom di mon vié kamarad la liit lé pi la litt . o sa nou sa va !
10 zwin 2014, 18:31, sanm nicaise
oté justin, ou la point trop la sance kan même, ziska perd le clé loto, ou çà out tête y lé donc,
fé travaille out coco, ben moin mi marche touzour ek le 2ème clé parce que kan ici ou la fine fé 200
km, é ki fé fré, ou gaingne pas dormi dan loto, bon enfin, fo pas y arrive à ou souvent.