Oté

Mi oi pa in n’afèr d’avnir la dan !

Justin / 22 mé 2013

Matant Zélida la ékrir Justin :
Mon shèr nové, mon spès salté, rouj de fon dovan léternité,
Astèr, si mi kopran bien, sé bann politik i vé mèt a lord dan lantropriz. Touléka, sé sak mi oi dann por : na tout in défilé dépité, lo mèr, sénatèr, tousa pou soi dizan aport zot soutien bann dokèr dan la grèv. Moin pèrsonèl, mi pans, lantropriz, sa in landroi patron èk travayèr i rankont pou diskité, pou trouv in térin lantant konm i di. Sa la pa in landroi pou d’moun déor fé zot dézord ; sa la pa in landroi demoun déor i vien pou fé présyon. Ala koman mi oi lé shoz, é moin lé sir é sèrtin, si i réspèk pa in règloman konm sa, tout demoun sar pèrdan, pa plis lo lantroipriz ké lo bann travayèr. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
I étone pa moin antann aou koz konm sa, san rod lo vré fon dé shoz konm dabitid. Pou kosa mi di sa ? Pars kan in bann travayèr la fine forsé pou aprann in métyé kalifyé, sé pou travay bien sir, é si posib travay dann péi zot lé éné. Travayé é viv o péi ! Sa in mo d’ord dopi lontan ni koné. Donn travay Kréol ! Sa ankor in kozman ni antann di dopi lontan, é pou moin, na poin arien lé rézonab konm sa. Astèr, si ou la fine aprann bien travay é ké lo patron i désid donn travay demoun déor, ou i konpran bien demoun lé an kolèr é lé zot lé solidèr la lite bann travayèr. Ou i konpran matant, si na d’moun i fo krétiké, la pa sak i aport zot solidarirté bann travayèr, mé sak lé pa solidèr. Bann patron rant zot lé solidèr. La droit avèk bann patron lé solidèr. L’Éta lokal, la plipar d’tan, i may dan zot trin. Donk, lé normal bann dokèr i gingn la solidarité zot kamarad. Moin, sa i déranj pa moin ! Pli pir matant, si i komans konm sa, moun déor va gingn travay é moun isi va dobout gèt. Ziskakan d’apré ou in n’afèr konm sa i pé diré. Mi oi pa in n’afèr d’avnir la dan !

 Justin 


Kanalreunion.com