Oté

Mi oi sa konm in vyolasion la démokrasi

Justin / 18 févrié 2011

Dann dèrnyé sondaz déssi la lang, sinkann-troi pour san d’moun La Rényon la déklar zot i koz arienk kréol rényoné. Trant-uit pour san la di zot i anvoy inn konm l’ote ; sa i fé, si mi tronp pa, katrovin onz pour san d’moun i manyé nout lang. Oi zot mèm si sa in bon z’outiy pou bien aprann l’ékol si i vé bien tiliz ali. Zordi, i roshign in pé, é lé shoz i avans in pti pé, mé pa si tan.
Dann télé, nana bien plis katrovin-dis pour san bann z’émission lé an fransé. Donk moin lé a domandé, si sondaz-la lé korèk, sa i vé dir nana par-la sinkant-troi pour san d’moun la télé san bien konprann lé shoz o-fon. Lé vré, nana z’imaz épi foto, donk i ède in pé, mé pa tou-a-fé konm k’i fo. Alor, bann sak i fé zot l’émission an fransé, zot i fé pa télé pou toulmoun... mé toulmoun i pèy.
Pou sak i koné bien koz fransé, mi èmré poz azot in késtyon sinp. Mi èmré konète si zot i gingn rogard in bon film an z’anglé é kossa zot i konpran dédan. Mi vé pa parl sak i manyé korèkteman la lang bann z’anglé. Mi vé solman parl sak soi i baragouine, soi i konpran pa arien dan la lang Shakespeare. Mi èmré savoir si zot i rogard avèk gou in film an z’anglé, sansa si zot i zape le z’afèr. Astèr, mazine ankor kan zot i zape, zot i artonm déssi in film an z’anglé, moin lé sir zot gaz va monté. Pars zot va pans sé in gran l’inzistis.
É bin alor, par l’fète, la pa in l’inzistis pou la mazorité d’moun i koz pa bien fransé, é i konpran pa bien lang-la, kan tout lo bann z’émission lé dann la lang bann fransé ? In l’inzistis, sansa in l’éskrokri ? Pou mon par, mi oi sa konm in vyolasion la démokrasi.

Justin


Kanalreunion.com