Oté

Mi pans pa, pou in n’afèr konm sa,
la sosiété va marsh plis an ki dsi tèt !

Justin / 20 avril 2013

Moin na in dalon la fé son gran z’étid dan la Frans nana in bonpé d’tan. Konm tout bann z’étidian, li té i sava ranpli son boujaron dann réstoran inivèrsitèr. Défoi, li rakont in pé son souvnans : Souvnans-la, sa in n’afèr i kont pou nou... Donk in zour, li rakont l’avé dé bonom té i viv an koupl, épi l’avé dé jèn madam ansanm zot koté té i viv galman ansanm. Daoir l’avé d’ot, mé té i fé pa romark azot par pèr la méshansté d’moun ; I paré kan banna té i ariv dann réstoran, in bonpé d’moun té i kriy, té i fé dézord, épi i di tout sort kalité kozman an bob dsi bann moun-la. I paré mèm, in zour, banna la gingn lo kou.

Sa i komans a daté pars mon dalon la fine fé in bon parti son parkour d’vi. Dizon dopi tan-la, dolo la fine koul d’sou bann pon. Mé sétaki, i diré lo tan lontan i rovien. Moin la lir kékpar, bann skinèd la atak in bar pars bann omo i artrouv azot la an parmi. D’isi d’laba, bann-la i fé atak azot, sansa gougnard azot, sansa ankor insilt azot... Zédi soir, bann dépité fransé la mank déklansh in bagar pars d’apré zot, in madam i travay dann in ministèr la rogard azot an foutan. Donk zot té i sava pou done lo fanm a konprann pou in sinp rogar.

Poitan, si moin la bien lir, nana trèz péi la fine légaliz lo mariaz pou toulmoun, an parmi l’Anglétèr èk la Nouvèl-Zéland. Na galman mariaz konm sa dann in bonpé z’Éta l’Amérik. Pou kosa in pé la pèr la sosiété i marsh dovan-déyèr si i zénéraliz lo mariaz sivil ? Moin la pa antann la sosiété i marsh ki dsi tèt l’androi la légaliz bann mariaz konm sa.

NB : Lo pli pir kozman moin la antann, sé in boug la di, si zordi i légaliz lo mariaz rant dé pèrsone mèm sèks, pou kosa domin i légaliz pa lo mariaz rant in moun é in shien. Lo pli pir, li té i di pa sa pou plézanté !

Justin


Kanalreunion.com