Oté

Mi pèy pa zinpo, mwin na gro loto... !

Justin / 12 févrié 2015

Oté, astèr kisa i sa oz di ankor zordi larzan i mank a nou ? A nou pérsonèl minm, shakinn dantronou i mank touzour in moné, i mank touzour diss santim pou fé in éro, mé la bank baya, la bank i débord télman la gèl lé plin, banna lé plin o zas o diton. In zournal la ba déor la rouv la vann, banna i dénons in frod fiskal i di sé in gro léskandal, pou lèr i gingn pa donn lo shif, i prétan lo shif an li minm i fé tourn la tèt domoun télman néna. Télman i koné pi konbyin miliar néna in bann i di kèk miliar pou finir.

Sé koué lo léskandal parlfèt ? Néna moun néna larzan an poundiak, boudikont larzan i ansèrv pa zot, si i mèt sa dann in bank an frans, si in kont, la dikou lé oblizé déklar dan zinpo, pou drib lo zinpo, néna in bank laba an suiss i kapar lo larzan, mé zis inn ti néstan, zis lo tan pou anvoy tousala dann in paradi fiskal konm i di, é la ni vi ni koni, larzan i dor trankil, ziska tan in boug la vann la mèsh. In pé lo ki i fé wuit-nèf i prétan, lo zournal va donn lo non firamézir.

Mé andan la, dan la list, dopi an o ziskan ba, i prétan néna osi réyoné, kisa la di la rényon lé oki ? Mwin té i krwa ziska zordi, konm a nou osi nou lé in paradi, donkalor bann moun i yinm zot péi, sak néna pou rovann, bana té i mèt tout zot larzan pou dévlop a li, mank in pé i mèt tout, ousasa. Sa i prouv a nou, larzan néna, pou in bann néna an gaspyi, pou dot inn ti mizing, apésa étonn a ou si in bann i shant : Mi pèy pa zinpo, mwin na gro loto…


Kanalreunion.com