Oté

Mi rèv La Rényon séin gran zardin oto-fèrtil !

Justin / 14 out 2014

Si zot na in zardin, moin lé sir zot i koné fé plansh. Kosa i lé in plansh ? Sé in sort bite la tèr antouré par in sort kanal tèl fason ké dolo, si nana an tro i évakyé dann lo bann ti rigol. A par k’sa lo bité lé bien plat épi la tèr lé bien galizé épi fin osi tèl fason ké lo bann plantasion i pous san tro forsé mèm si zot ti rasine lé tann. Apré zot i koné, in pé i mète l’angré, fimyé, sansa konpost konmsa la tèr lé fèrtil é ou i fé pous sak oui vé, mé sirtou légime épi zépis. Fèrtil ? Sa i fé pans amoin in n’afèr. mi sava dir azot kosa ..

Zot i koné, plansh dann jardin i pé ète fèrtil tousèl, li pé fèrtil ali par li mèm. Koman i fé sa ? Dabor i fouy in fos an armasan lo bone tèr in koté, la tèr mèg in n’ot koté. Dann fon la fos i mète bann boi pouri si nana, si na poin boi vèr. Aprésa i pé rokouv avèk la paye, sansa avèk pti morso d’boi, la siyir do boi pou touf lo boi. Kan lé fini i mète la tèr mèg dési épi la tèr rish par dsi ankor, avèk zèrb, avèk pti paye, fimyé si nana pou fé konpos ansanm aprésa ankor.I rokouv tousala sanm in in bash avèk lo trou dodan- po la tèr réspiré, épi i lès travay.
Kan la fine bien travay, l’èr-la ou i pé plant out légime, out flèr, out tizane tousa la mélanjé pars la tèr lé fèrtil épi li ramas l’imidité,la rosé, lo pti farine la plui. Astèr-la matant ou nana kék z’ané dovan ou avèk out plansh an bite, i fèrtil ali tousèl.
Biensir sa la pa lo sèl fason planté- i fo pa ète séktèr, i fo pa an avoir léspri boushé !-, mé moin pèrsonèl mi trouv sé in bon fason, pou bann ti kolon sirtou an avoir in bon rannman dan zot ti karo... Mi rèv mèm La Rényon sé in gran jardin é anplis ké sa in gran zardin otofertil Sré vayan in n’afèr konmsa ! zot i trouv pa ?

Justin


Kanalreunion.com