Oté

Mi souète zot tout in bon Varusha Pirappu, In bon zour d’lan tamoul !

Justin / 14 avril 2014

Mi souvien sé in n’afèr k’i romont in bon koup de tan. Lété dann tan té i komans fé la fète zour d’lan tamoul pars moin la konète osi lo tan téi fète pa zour d’lan la ! Donkalor, dann tan-la, moin té apré diskite avèk in bon kamarad, zordi la fine désote la vi é lo ga téi di amoin konmsa pèrsone, an parmi bann malbar La Rényon, té i koné égzaktoman la date lo zour d’lan zot bann nasyon la sort dann l’Inn. Moin, moin té i di ali, mi pans kant mèm nana dé vyé z’ansien i doi konète sa, sansa bann moun la voiyajé pou rankont demoun dann l’Inn. Nout diskisyon l’arète la, pars li konm moin té i pé pa aprouvé sak zot lété apré di.

Pou kosa mi di sa ? Pars sé tan isi i tonm zour d’lan tamoul épi in bonpé d’moun i koné nou lé dann l’ané 5115 kalandriyé tamoul. Ni koné kalandriyé la na ankor favèr dann lo Tamil Nadu shé désèrtin télugu épi an parmi bann tamoul dispèrsé in pé partou- i apèl sa lo diaspora. Mi pans sa pars dann tan-la demoun lété in pé divizé dsi la késtyonn rotour dsi bann tradisyon, vi k’pou in pé nou téi dové kontant anou d’ète fransé, in poin sé tou... mèm ète rényoné lété mal vi, sé dir azot réklam son bann zansète téi sort l’Inn si sa té pa in krime do lèz-La Frans. Zordi lo tan kouyonis-la lé déyèr nou, mi éspèr, pou in gran majorité d’moun. Mé nou la bien vi, la pèr lo kominalis pou La Rényon, té konm bann goloi kan téi kroi lo syèl té i sar tonm dsi z’ot koko. Mi di pa na poin inn-dé moun aryéré d’isi d’la-ba, pars lé rar la kouyonis demoun i disparète tou d’in kou san lès la tras. Dé foi li lé asoupi, é li domann k’a révéyé.

Donk zordi ni koné épi ni di nou na zansète i sort l’Inn konm nou na zansète i sort l’afrik, la Chine, Madégascar, La Frans épi ankor d’ot péi. Ni koné La Rényon lé konm in pé i di in vré kaléïdoskop é lé myé ké ni rokoné sa, pars rofoul in vérité konm sa, lé pa bon pou nout moral épi pou nout santé.
Donk dopi lo trèz ziska lo kinz, bann rényoné sak i rokoné zot na zansète tamoul, mèm sak i rokoné pa sa, l’apré viv in gran fète é so fète-la sé zour d’lan tamoul. Donk bone ané tamoul, bon Varusha Pirappu, zot tout, nout tout é konm di lo kont, kontinyé konm sa.

Justin


Kanalreunion.com