Oté

Mi vot pi !

Justin / 8 désanm 2015

Dopi lontan mi lir dan nout zournal ké nout léstati i konvyin pi pou aryin. Nout léstati i réponn pi par rapor in takon boubou néna dan nout péi. Daborinn, bann boubou shomaz, ni arèt pi di koman shomaz i karsèr a nou, bann zèn aou, bann sonior aou, tanzantan mwin la anvi di i kansèr a nou. Lé vré pou vréman la politik l’intégrasyon dopi lontan la ral a nou déryèr.landomin zéléksyon mi antan dann télé “Mwin la bash lo vot parské travay la pwin. Mwin la bash lo vot parské lo mèr na pwin aryin pou doné“

Konm si dann nout léstati, lo mèr i dwa donn travay nout tout, fé la kaz pou nout tout. Donkalor fo shanz lo léstati ? I prétan lo léstati lé bouloné èk lalinéa sink l’artik 73 la konstitisyon, lo bann zinstitisyon lé bloké. Poitan konm déor nou néna la kominn, nou néna lo départman, la kominoté d’kominn é pi nou néna la Rézyon zordi èk in bon pé pouvwar, èk nouvo pouvwar. Dimansh, nou lavé lokasyon donn in lavi, solman 45 pour san d’moun la réponn.

Konm si domoun i krwa pi, konm si domoun lé pi la èk sa. Pou kisa mi sar voté ? Mi vot pi vik zot tout lé parèy. Mi vot pi vik mwin na pwin travay. Mi vot pi par rapor mon p’ti rotrèt. Mi vot pi pou bann mantèr. Dir néna i promèt ankor 30000 enplwa, i promèt ankor otan la kaz. Sanm pou mwin lé pa zordi la vèy pou domoun artourn o zirn konm i sava. Pétèt èk in léstati i donn anvi ! Pétèt èk in lasanblé inik !


Kanalreunion.com