Oté

Minm pa pèr !

Justin / 3 séptanm 2015

So manké lo prézidan la rézyon i port plint kont nout kamarad Paul Vérgès ? Mi di somanké, a koz, rant dir é fèr sé dé. Li lé dan lanmerdman èk tout zafèr i sort si la rout litoral. Tout i koné, in gran léskandal larzan i amiz pa pou pété i di, èk sa néna lo problinm rosh madégaskar, tousala azouté i pé fatig son koko. Sépousa, mi di pa li lé inn ti malfondé, mé lété konm sik. Li port pa plint konk lo zournal i anons lo léskandal, li port plint kont Paul. Byin fé, nout kamarad la anvoy a li dann tan Pérreau Pradier.

Shakinn i koné kisa i lé Perreau Pradier ? In préfé réaksyonèr banna la anvoy la Rényon dann zané sinkant, sinkant sis i di. Banna la anvoy a li pou fé lo ménaz, a mwin mi di pou fé la gèr kont kominis. Tan la, gouvernman lavé pèr kominis, lavé dé dépité kominis, Mondon èk Paul. Té zis apré 46. Pou mat kominis la anvoy lo préfé réaksyonèr. Oila koman li la ariv isi. So moman la, la komans bouraz lé zirn, Pou dépouyaz navé touzour pann kouran, nérvi gran shomin té péyé pou fé karousèl, domoun té vot inn, dé, trwa fwa.

Pou mwin lo pli gran léskandal sé kan la anvoy bann fonksyonè travay la ba déor, èk lordonans Débré. San prévni, di zour o landmin banna la rotrouv a zot la ba déor san konprann. Pou rézon bann fonksyonèr i troub lord piblik sanm pou zot, sépousa éksopré la éspatri a zot. Somanké désertin lé nostalzik tan la, minm si zot lé zinn, minm si zot i koné pa zistwar nout péi, somanké lé dan lé zènn minm. Parlfèt pou la plint nout kamarad la finn viv miéksa, li di, “minm pa pèr“.


Kanalreunion.com