Oté

Miss, lé pa mon délir !

Justin / 21 zwiyé 2015

Dopi samdi swar la rényon lé pi parèy, Dopi samdi swar nou néna nout miss. Mwin té i sar di anfin. Té i mank a nou baya, parl pi koman. Pandan in bon koup do tan lavé pi d’miss, vik lo miss 2014 té pi dan lé klou i di, èl la dénonss lo tourné-viré banna, sak banna té i fé èk zot dann kouliss. Mi domann a mwin koman nou la fé pou atann tou so tan la san miss ? Vik sé èl ki défann nout “il“. Zot i koné la miss rényon néna in misyon, son misyon sé défann nout “il“sé, roprézant nout “il“mi di a zot.

Sé pa in nafèr nouvo, tou lé zan i rokomans. Fo war koman la télé i zoué la d’si, kinz zour, in mwa avan i donn pou roulé. Pou mèt a nou pou vréman dann lanbians, bann zoperatèr téléfonn i bat do bèr, bann sponnsor i lish lo dwa. Sèt ané kado té plizoumwin orizinal, lavé loto, bizou, vwayaz… é pou fini, é pou mwin sé la soriz si gato, la miss la gingn in lanplwa dann in bwat. Mi domann a mwin, vik navé 12 kandidat, lé 12 té i pé ginyé, donkalor tou lé 12 lavé konpetans pou fé lo travay la bwat té i propoz ?

Zot la konpri, pou guing in travay, pi bozwin alé lékol, pi bozwin fé in léstag, in formasyon tousala, pi bozwin fé in domann pol anplwa, atann mwa d’zwiyèt shak ané. Mé pousa i fo mézir o mwin 1m80 pa èt tro gro, konm mi di la bon o, pa bezwin alé tro lékol, zis pou nyabou sirtou défann “son il“. Koté mwin néna inn ti mamzèl la gingn son BAC s èk mansyon tré byin, èk plis de 18 de mwayinn. Domaz èl té pa kandidat, pou sir mwin té i vot pou èl, mé konm èl i di “Odrémié alé lékol, èt miss, lé pa mon délir“.


Kanalreunion.com