Oté

Modèl z’alman ? Tardra viendra, zot va oir si sa i ariv pa !

Justin / 4 mai 2013

Mi koné pa si zot la romark bann komantèr l’aktialité, sirtou bann komantèr l’ékonomi. I diré so bann moun-la i koné tout z’afèr, si tèlman k’i étone amoin la pankor fé rant tout bann moun-la dann gouvèrnman... vi k’zot i koné plis ké bann gouvèrnman, épi zot nana touzour la répons k’i fo dan tout sitiasion. Pou l’Erop, zot nana la solision, i fo fé konm l’Almagn. Gouvèrnman fransé na ka fé konm l’Almagn ! L’Itali, i fo li fé konm l’Almagn ! L’Éspagn, parèy ! L’Almagn, mi di azot, l’Almagn mi di azot... Sé lo modèl !

Solman, kan ou ékout in pé désèrtin moun i irl pa èk bann lou, kosa ou i antan. Dan l’Almagn, i fo shoizi : soi ou i travay, soi ou i okip out z’anfan. Lo péi i fé pa l’anbara avèk bann krèsh é tout lo koméraj. Lo sosial, madam Merkel i may pa èk sa ; L’èr-la, demoun i gingn pa tro z’anfan dann péi-la, donk lo shomaj lé pa tro for. In pé i di, la kroisans lo PIB lé for, mé kan ou i rogard lo shif, ou i apèrsoi na mèm pa in poin la kroisans : i parl zéro poin sis, sansa zéro poin nèf.

Astèr, si ou i rogard la késtionn salèr, ou oi dé ka bien diféran. Par égzanp, dan l’indistri l’otomobil, bann zouvriyé z’alman i gingn plis la moné ké bann zouvriyé fransé, zot i gingn mèm in bon moné. Lé bèl pou zot ! Mé so matin, dann radio, moin la antann, na troi milion bann travayèr i travay san konvansion, é konm lo SMIC i égzis pa, zot i gingn sis éro par èr d’tan, mèm dan dé-troi l’androi, troi éro. Ala in drol modèl an vérité. Solman, si lo péi i kontinié konm sa, moin sré pa étoné ki fini par mord son doi. Pou kosa ? Pars afors ankouraz l’ostérité pou lé zot péi l’Erop, v’ariv in zour l’indistri l’Almagn va gingn moins kliyan, v’ariv lo zour son l’ékonomi va plonj galman dan la résésion.

Tardra viendra, zot va oir si sa i ariv pa !

Justin


Kanalreunion.com