Oté

Moin la pa pou la politik l’otruch !

Justin / 28 out 2013

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité,
Mi domann amoin si in zour bann zournal va konprann in pé lo tor zot i fé La Rényon. Toultan l’apré parl la mizèr, toultan l’apré fé foto pou amontr so mizèr-la. Aprésa, in pé i pran sa, i mèt sa dsi sak i apèl "la fèskabri" épi i fane sa dan lo mond antyé. Sé konm sa, di amoin, zot i pans nou va rouv anou an bien dsi lo mond antyé ? Sé konm sa, zot i pans, nou va marsh an avan olèrk arkil an aryèr ? Moin lé dézolé, mé la plipar d’tan, sa la pa La Rényon zot l’apré amontré... Toultan k’té la propagann bann rouj-de-fon té i amontr sa, té pa grav ! Toulmoun i koné zot l’éspri tor, mé ala ké zordi, sé bann zournal la droit, épi bann télé la droit galman k’i amontr sa, par plézir, par gou pou démont anou... Fransh vérité, moin lé apré domandé si la propagann bann rouj la pa kontamine banna. Tok ! Pran sa pou toué !

Justin la fé pou répons :
Mon vyé matant k’i koz touzour la boush rouvèr,
L’èr-la, si mi konpran aou bien, i fo pi anparl sak i mèt pa nou anlèr, i fo arienk anparl sak i amontr bann Rényoné dsou in bon zour. Parl pi la mizèr ! Parl pi la vyolans ! Parl pi la salté ! Parl pi la maladi ! Parl pi lo mové lojman ! Mi koné in péi la di konm sa, shé zot, pèrsone la pa gingn shikungounya, shé zot rokin i karès demoun, mé i mord pa, shé zot la poin krime, demoun la pa fin... Mé zordi, zot lé blijé rokonèt in pé la vérité, mèm si, paré-t-il, sa la pa bon pou lo tourism... Mon vyé matant, mi trouv pli préférab di sak lé bon konm sak lé pa bon. Aprésa, tash moiyin rann sak lé bon ankor pli bon, é rann sak lé pa bon in pé méyèr. Na in ta z’afèr i roul pa ron La Rényon. Sa ni koné, mé nou na la solisyon pou amélyor lé shoz, alor, alon rotrous nout mansh. Nana dé shoz i marsh bien, é bin alon rann azot ankor méyèr. Moin mi oi lé shoz konm sa ! Mi pans mon parti i oi pa lé shoz otroman. Moin lé sir, kan Paul Vergès té prézidan la Réjyon, té konm sa ké li té i oi lé shoz... Zamé d’la vi moin sré pou kashyèt sak lé pa bon, é pou anparl solman sak lé bon... La politik l’otruch ? Sa la pa mon n’afèr. Tok ! Pran sa pou ou !

 Justin 


Kanalreunion.com