Oté

Moin la pèr son kanar lé noir !

Justin / 14 novembre 2012

Matant Zélida la ékrir Justin :
Si mi tronp pa, lé fasil kozé, lé difisil fèr ! Kan pti prézidan Sarkozy lété ki diriz la Frans, son l’opozisyon navé pi d’mo pou agoniz ali. Bann rouj-de-fon konm lé zot ! Astèr, François Hollande la gingn z’éléksyon, i tard pa pou toulmoun sot dsi li : son l’opozisyon pou komansé, plis sak i pé apèl son z’ènmi l’intéryèr, épi son fitir z’ènmi l’intéryèr. I paré sa kot i dégrèn an katriyèm vitès. Konm Daniel Vabois té i di pou Gran Bassin : "Ou i dsann, ou i dsann, ou i dsann, ou i ariv o-fon !". Fransh vérité, bann Fransé noré myé fé lès prézidan Sarkozy an plas. Li té déza dann fon, donk li l’avé pi pou désann. Navé pi trou d’èr pou ral ali dann fon. Tok ! Pran sa pou toi !

Justin la fé pou répons :
Mi pans pa in z’éléksyon sé in zé ! Mi kroi pa sé par zé ké bann Fransé la vot pou Hollande ! Moin lé sir bann Rényoné la vot pou Hollande épi pou plizyèr dépité sosyalis pars in bonpé d’moun, in gran mazorité, mi ashèv dir, té i gingn pi ansort azot. Mé solman, mi pans pa bann Fransé épi bann Rényoné i kroi na poin solisyon pou zot problèm. Si zot té i kroi sa, zot noré pi bouzé, atann mové tan pasé épi pou arpran réspirasyon apré. Non ! Bann Rényoné, konm bann Fransé, i pans nana solisyon pou zot, mé ziska zordi, zot lé pa sir la politik Hollande i amèn sé pou défann l’intéré la mazorité dmoun. Dizon zot i pans sé lo kontrèr ! Yèr soir, li la koz in kou ! Nou va oir si pou bann moun la rogard son l’émisyon, li gingn bien ésplik son ka. Pou nou Rényoné, ni pans na solisyon : solisyon pou tout-suit épi solisyon pou domin, apré domin, aprésa ankor. Touléka, si tout son bann z’anvoiyé lé konm son minis l’Outre-mèr pou ésplik la politik lo shèf, moin la pèr son kanar sar noir pli vit ké li kroi. Tok ! Pran sa pou ou !

NB : Tout fason, mi pé ékri sak mi vé, mésyé Lurel lé d’avi ké na arienk dé zournal La Rényon. Sé sak li la di dann radyo Fridom. Li koné mèm pa na zournal “Témoignages”... a moin ké li fé konm si ?

Justin


Kanalreunion.com