Oté

Moin lé dézespéré, mon péi lé sal, sal, sal, koué i fo fé ?

Témoignages.re / 6 févrié 2014

Oté, mi koné pi kosa i fo fé ? -sé pa parol in sanson- sé pa in nafèr i fé plézir a moin, ékrir ladsi mé mi an pé pi ; war tou lé zour la salté, lasalté, lasalté partou !
Mi rapèl in lané na pétèt dis, kinz zan dsa, moin la vi in roportaz té pa RFO, pétèt loèrtéèf, in dimans soir, i apèlsa ér d grand ékout ; inn zournalis, inn fame biin sir, él té armontr a nou bann zandroi pik-nik, zandroi biin frékanté, dann bord rivièr : do moun i zèt tout, tibèrso, masine a lavé, vié soulié dann sak plastik.
Konm si domoun la vil poubèl zot kaz na pi ; i sar fé tour d lil : i anbark pa solman lo rougayi sosis, i anbark osi lo bann zordir ; oté bayoun in pé d respé , pou nout lanvironman ! Siouplé !

La i-èr swar, mi tourn an port a port ék in dalon ; a la lo kamarad sitoiyin i parl a moin in ta la sand si lo bor la falèz la rivièr ; li di a moin : « oui koné, gro ta la sand, ki sa i produi la sand an grand kantité isi la Rényon ? » -lizine, lizine sikrièr- bon
Li di a moin li émré war lo kaié dé sarz (cahier des charges, an fransé) ; normalman lantropriz la giny lo marsé la poin lo droi fé ninport koué é dépoz ninport ou !
Bon, la sand kan i giny la pli i dsann ék lo ti ravine dan la rivièr, li fé in vaz, kréol i di la bou…

So bou la, ou sa li sa va ? Li glis dan la mèr ; dan la mèr, la bou i dépoz si lo fon, li arkouv tout ; li artié bann zerb la mèr i apèl zalg ; lo poison, lo makabi si ti préfèr, si li lé èrbivor, li krèv. Sak i manz dot poison, lé karnivor, li na pi manzé li mor. Si na pi la vi dan nout mèr, sava fèr in mer mort konm an Israël ou an Palestine koté laba !
Moin lé dézespéré, mon péi i doviin sal, sal, mé kosa i fo fé po arèt sa ?

 Justin 


Kanalreunion.com