Oté

Moin lé pa kont lo progré téknik, mé toudminm !

Justin / 3 zwin 2014

Ouala jordu kèl réfléksyon moin la anvi partaj ék zot.
Sak i suiv a moin un peu i koné moin na un park kabri, kékpar laRényon ; ma dir a zot in secré, nin peu i di segré.
Minm si moin la rod dann boi in plas plat, li lé inn ti peu an pant ; minm la fason lo park lé konstrui, kan moin lé anlèr a po amar in pakéd z erb po lo deu chèvr, mi voi bien un chemin an ba, é bokou domoun i kour, i di i fé jogging (mo anglé).
Kél progré téknik na laddan ?

Samdi la, a pé pré 9 ér lo matin, mi voi in boug (en jogging) ; mé tors nu, ko sa li port si son bra goch, in braslé noir, on diré lé an kuir, i sèr son biseps, zot i koné sé koué ?
Dé pi lontan, ni sar médsin, i sér in nafèr si nout bra po pran nout tansion…
Mé koméla, ék so laparèy, sa i mézir in pé tout : out ritm kardiak antr otr !
Moin lé pa kont lo progré téknik ; mé la ou la bézoin, tou lé zour ou kour, mézir tou sa la ? Ton kèr i fé doung doung, ou badaboum, badaboum ; ti fé in légzersis fizik, ton bann mis va travay, i fodra aport a zot loksizèn, lo san va aport sa ; o plis ton kor i travay, lo bann sélil miskilèr i vé nouritir ; bann globil rouz i aport sa dann zartèr ; lo kèr sé lo ponp rofoulant, li kontrak konm in poir an kaoutchou.

Plis ti aksélèr ton kours, plis lo kèr i bat pli vit ; minm ton respirasyon i sar pli vit ; ti san pa toué lé esouflé ? Ti san pa ton respirasyon i komans nir difisil ?
Toué la bézoin in laparey po di a toué i fo ralanti, arèt kouri, mars in pé, ziska tan tout i rodovien normal ?
A non, i fo asét so laparey ? zordu nou lé tanté par tout so bann gadzèt… a moin mi trouv.
Atansyon, moin lé pa kont lo progré téknik, mé toudminm ! Baya !

Justin


Kanalreunion.com