Oté

Moin lé sir, z’ot mové z’am té la !
Touléka, zot lété pa loin !

Témoignages.re / 16 désanm 2009

CPR ! Zot i koné kossa sa i vé dir ? “Chemin de fer et port de La Réunion”. Lo por, binsir, lé ankor la, mé lo shominn fèr… sa i fé lontan bann kapitalis-kontoir kolonyal la fine sabote ali. Pou kossa ? Pou in bonpé rézon. La di sa in konsantrasyon bann rouj-de-fon. La di ossi lo trin té fine tro vyé pou arpran favèr. La di sirtou, lo kar pou passazé, kamyon pou marshandiz i pé byin ranplas lo trin… pars sa i pass partou dépi bor d’mèr ziska dan lé o, fasilman. Epi, l’avé moiyin gingn gro larzan san forsé.
Sa lété dann bann z’ané 1960 ! Nana lontan, mé koméla, in voiyaz demoun la déside bar shomin lo tram-trin. Pou kossa ? Sré pa pou lo mèm rézon k’la sabote lo ti-trin ? Sré pa ankor in foi pars in pé l’apré kalkil fé larzan, fasilman, déssi la tète Kréol ? Touléka, i arsanm byin lo tan lontan... Lo tan lo gran sabotaz... lo tan déssèrtin politik, déssèrtin kapitalis, épi l’Éta lokal lété mèm konplis. Moin lé sir, mové z’am banna lété avèk Didier Robert épi Virapoullé Sin-Pyèr dimansh matin... Touléka, i pé dir zot lété pa byin loin !

 Justin 


Kanalreunion.com