Oté

« Moin na poin z’anfan pou done tété ! »

In kozman pou la rout

Justin / 30 novanm 2016

Souvan dé foi moin la antann kozman-la, dann la boush demoun rézonab, sansa dann kozman bann sélibatèr. Moin na poin l’éstatistik mé sanm pou moin sa sé in kozman bonpé d’moun i koné. Sansa lé si tèlman fasil pou konprann é pou mète an mémoir : promyé foi antandi, rozistré toutsuit. Dizon sa i vé dir moin lé lib pou mon l’anploi di tan. Lib ? Sa sé in n’afèr lé valab ! Mé lib avèk in l’anploi di tan ? Nana kékshoz konm in kontradiksyon ! Par l’fète, dann nout sosyété, oplis i sava, oplis o i di ou lé lib, oplis out l’anploi di tan lé konm sardine an boite dann tan lontan. Lib mé okipé ! Pou out zoumba ! Pou out marsh a pyé avèk baton norvézien ! Pou alé rod travaye ! Pou alé pèrd out tan pol anploi ! Pou vèye zanfan lé zot ! Pou alé bataye dann grann sirfas pou pran in produi in éro ! Pou lo télé novéla k’i ranpli tout l’aprémidi ! Arzout èk sa, pou répète toultan : moin la poin l’tan, la poin l’tan, la poin l’tan. Alé ! Mi éstop tèr-la é ni artrouv pli d’van sipétadyé !


Kanalreunion.com