Oté

Mon bank, mon dé troi kabri, pa koté an bours !

Justin / 14 zwin 2014

Minm si lo dolar amérikin i mont ou i bès, minm si léro i mont ou i bès ou lo yen, lo shiling, lo pézétas, lo roupi, lo dolar ostraliin ou néozélandé ; lo réal bréziliin, minm si lintéré leskont lo livré A i grinp ou i dégringol, lo KAK 40, lo downjons, anfin mi antan la radio, mi konpran pa tout… mon dé troi kabri, moin lapré fé grosi, po ésay vann inn ti pri, artir in moné, a zot i rès parey ; i manz, i boi, i kri, i dor, i rimine, i donn kou t korn dan la tol ; tou lé zour, mi ogard, la otèr i mont, i mont.

Na minm grin angrèsman, i fo lo vant i arondi inn ti pé, po ankouraz a moin donn a zot sak zot la bézoin. Mi vé voir a zot kontan ; an santé ; konmsa moin osi moin lé fièr !
Sak moin lé satisfé, sé, koi ki spas dan lmond, a zot, la minm, zot valèr i élèv puiske zot lé an kroisans.
E ankor, mi tir pa tout sak mi devré.
Moin la po lir in revu 1960, « tou luniver », in lansiklopédi mansiél ; bayoun, i montr a ou tout fromaz i fé an Frans : la kantité fromaz chèvr… si moin té vé, moin té giny boir lo lé, mèt sèl dan, ramas a li din koin, fé osi mon krotin !

Bayoun, inn ti staz formasyon ; moin fine ariv vandèr fromaz chèvr, é mounoir sa la pa mon kiltir dorijine, mé kan ou la fine gout sa, si ou la trouv bon, fé gout out voizin, out marmay, out kopin, out kopine… zot minm i arfé pas kamarad an kamarad.
Mi préfèr dé zanimo (konm in kok, in poul), in lesin mous a mièl, dé troi kabri, konm sa, si New-York, Paris, Berlin, Tokio ou Pékin, zot na in problèm kotasyon an bours, a moin non ; mi kontinu roul ron po toul tan !

Justin


Kanalreunion.com