Oté

Mon pti kolonyalis ilistré 4 - Kisa la tyé Sankara é pou kosa ?

Justin / 8 septembre 2016

Mi pans moin la fine dir azot kèl politik Sankara téi vé amenn dann son péi épi dann l’Afrik-konm moin la di lété in politik panafrikène. Li té i di souvan avèk lo bann prézidan l’Afrik : i fo ni fé dann l’ Afrik tout sak nout kontinan la bézoin san fé vnir dopi La Frans sansa l’Erop . In zour li la amontr son kostime épi li la di : dann son linz na poin in fil i sort déor, tout lé fé dopi A ziska Z dann mon péi é tout mon délégasyon lé abiyé konmsa. Demoun la bate la min épi la ri, mé moin lé sir bann sosyété La Frans la pa ri pou vréman - amoins la rir jone . [1]

In zour in moun i di Sankara lo Che lé mor l’az trant-nèvan é Sankara i di konmsa sé l’az li va gingn l’ané 1988 é i paré sa té i rann ali tris… li la pa trap son trant-névan, son bann z’ènmi la tyé ali l’ané 1987, lo 15 oktob vèr katrèr édmi é la tyé an mèm tan 12 an parmi son bann kolaboratèr. Kisa la tyé ali ? Bann solda téi fé parti bann z’onm komandé par Blaise Compaoré, son méyèr kamarad, sak li l’avé in gran l’amityé pou li. Moin la fine dir azot lé dé l’avé fé z’ot formasyon ansanm, é tou lé dé l’avé fé z’ot group z’ofisyé kominis ansanm, é Sankara té son témoin pou son maryaz.

Alor, sé Blaise la fé tyé ali ? Lo boug la touzour di la pa li la donn l’ord mé bann solda la pran la désizyon par zot mèm. Sak lé sir sé ké Blaise la pran la plas prézidan l’ané Sankara lé mor ziska l’ané 2014. Mé sak lé sir sé ké li la pa fé arien pou anpèsh lo krime. Mé, sak lé vré galman sé ké Sankara lété viktime in vré konplo internasyonal. Nou va oir sa proshène foi .

(La pankor fini)

[1Konmsi, isi La Rényon noré in pouvoir i diré tout sak ni ansèrv nou va fé dann nout péi. Mi pans in bann sosyété kapitalis lé riskab grins lo dan. Poitan té pa in pé sak nou téi rèv fé kan Paul Vergès lété prézidan la Réjyon pou l’otonomi énèrzétik, é pou l’oto sifizans alimantèr ?


Kanalreunion.com