Oté

« Mor isi, I arlèv Madras »

In kozman pou la rout

Justin / 5 désanm 2016

Mi koné pa bien si zordi ankor néna in bonpé d’moun La Rényon I kroi la métempsychose. Sa sé bann moun i pans ou nana plizyèr vi é kan ou la fini avèk inn,ou i arkomans avèk l’ot. Bann krétien i kroi bien , la vi étèrnèl, alors akoz pa kroir kozman moin la mark an-o la ?Touléka, dann l’istoir nout péi sa la donn drol de shoz.Mon vyé gran-pèr té i rakont amoin bann z’angazé lété si tèlman maléré ké zot té i mète la kord dann l’éspoir roviv shé zot .La fé konm in l’épidémi é téi kont pi lo nonm suisidé !I parétré bann z’angazis la trouv in parad :zot la pèrs lo zyé bann pandiyé épi zot la fèr kroir lo moun noré révèy avèg dann l’Inn. Vré ? Pa vré ? Mi koné pa é mi pans solman lo sistèm z ‘angazé osi lété krime kont l’imanité. ! Alé ! Mi arète tèrla é ni artrouv pli d’van sipétadyé !