Oté

Moun rish lé maléré, oui !

Justin / 21 zwiyé 2010

Matante Zélida la ékrir Justin :
Mon shèr nové, mon spès salté,
Mi konpran pa kossa bann zournalis nana kont sète pov madam Bettancourt, méssyé Woerth é son madam, plis ankor d’ote moun. Alor, ète rish, koméla, sé in krime ? Alor, an avoir amass larzan, i sifi pou ète koupab ? Érozman, nout ti prézidan lé la pou anpèsh bann rouj-de-fon épi toute bann zalou fé déga konmsa. Si zot i pans zot va gagné, é bin ! Bon kouraz, pars pou moin, zot konba lé pèrdi par avans. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
Mi èm byin koman, ou k’nana konm moin oute po d’fèss dann out min, vi pran parti pou bann rish, bann plin o-z’as. Pa in pti pé rish oui ! Vyé madam-la la donn in milyar inn, sink milyon in n’ote, dé milyon in troizyèm k’i gardyin in z’il, i prétan èl l’ashté. I fo dir sète-la lé maléré pou d’vré. Pou kossa ? Pars li lé blizé alé tazantan dann le lil épi gingn kou d’pikir moustik an pagaye... Pou anshévé, bann rish lé blijé partaz zot larzan avèk bann politik la Droite, anbosh z’ot madam, invite banna pou manzé… étsétéra, étsétéra la ké lo ra ! Matante, ou i pé dir moun rish lé maléré… i fé pityé oui ! É bann maléré lé byin-éré, daoir ?

Justin


Kanalreunion.com