Oté

« Mové mètr, I donn son shien mové manyèr ! »

In kozman pou la rout

Justin / 29 zwin 2016

I parétré sa sé in n’afèr ké lé vré toulbon… Konbien foi moin la antann dir in kékshoz konmsa : in shien mové sé ké son mètr lé mové, in shien jantiy sé ké son mètr lé jantiy, in shien bien élvé sé ké son mètr lé bien élvé.

Moin, pou mon par, mi poz amoin késtyon mèm si mi arkoné ké lo shien i fé tout pou fé plézir son mètr : li lé méshan si lo mètr i vé ké li lé, zantiy si li vé ké lo shien lé zantiy. Solman, d’apré zot, i ariv pa ké lo shien i pète in kab ? Kan sa i ariv, mèm son mèt i gingn pa kal ali. Sansa i ariv pa ké, san fèr éspré, ou i rant dann in domène lo shien i pans li lé gardien.

Donk soi li aboye aou, soi li mord aou dan la vyann, soi i pé ariv aou dé shoz grav. Mi rapèl in foi in madam i anpèsh demoun pass dann son shomin épi èl téi di si lo moun i pass èl i larg lo shien dsi. In ga la fé pou répons : « Ou lé pli mové ké out shien ! » é pétète té vré pou vréman. Alé ! Ni artrouv pli d’van !


Kanalreunion.com